Guliston davlat universiteti ham 14 kunlik masofaviy ta’limga o‘tkazildi

Guliston davlat universitetining barcha fakultetlari to‘liq 14 kunlik masofaviy ta’limga o‘tkazildi. Bu haqda universitet matbuot xizmatiga tayanib “Sirdaryo xabarlari” ma’lum qildi.

Universitet matbuot xizmatining ma’lum qilishicha, o‘quv dargohi koronavirus infeksiyasining kirib kelishi va tarqalishining oldini olish bo‘yicha tuzilgan Maxsus komissiya qarorining tegishli bandlari va Sirdaryo viloyati Sanitariya-epidemiologik osoyishtalik va jamoat salomatligi boshqarmasi taqdimnomasiga binoan 2021-yilning 27-aprel kunidan boshlab masofaviy shaklga o‘tgan.

Avvalroq Farg‘ona davlat universiteti karantinga yopilgani, Toshkent davlat sharqshunoslik universitetida darslar 22-apreldan masofaviy shaklga o‘tkazilgani, O‘zJOKUda masofaviy ta’lim o‘quv yili oxirigacha davom ettirilishi haqida xabar berilgan edi.

Bundan avval Jismoniy tarbiya va sport universiteti va Jahon tillari universiteti hamda uning akademik litseyida ham o‘quv jarayonlari onlayn shaklga o‘tkazilgandi. Jahon iqtisodiyoti va diplomatiya universiteti 19-apreldan, Samarqand iqtisodiyot va servis institutida esa 20-apreldan 14 kunga masofaviy shaklga o‘tkazilgani haqida xabar berilgandi.