Ўзбекистонда Буюк Британияда аниқланган коронавируснинг янги штаммидан касалланган бемор йўқ. Бу ҳақда соғлиқни сақлаш вазири Абудуҳаким Ҳожибоев «Дарё»га маълум қилди.

Абдуҳаким Ҳожибоев

Фото: "Дарё"

Эслатиб ўтамиз, Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэттью Хенкок маълум қилган. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфли эмас.

Коронавируснинг Англияда аниқланган янги штамми Ўзбекистонда ҳали аниқлангани йўқ. Ҳозирда бизда ушбу штаммни юқтирган бемор йўқ, – деди соғлиқни сақлаш вазири.

Ўзбекистон Соғлиқни сақлаш вазирлиги коронавируснинг янги штамми ҳақида 2020 йилнинг декабрь ойида илк бор маълумот берган эди. Унда айтилишича, мутациянинг қанчалик кенг кўламда бўлиши вируснинг тарқалувчанлиги билан боғлиқ, яъни касалликни юқтирган ҳар учинчи, тўртинчи одамда бу вирус мутацияси кузатилади. Коронавирусга қарши ишлаб чиқилаётган вакциналар касалликнинг янги штаммига ҳам таъсир қилади.

Вакцина иммун тизимини вируснинг турли таркибий қисмларига ҳужум қилиш учун тайёрлайди, бу эса тожнинг муайян қисми мутацияга учраса ҳам, вакцина самараси сақланиб қолишини англатади. Дунё олимлари вирус вакцинага қарши тура оладиган мутантларни келтириб чиқарса, коронавирусга қарши вакциналарни касалликка мослаштириб бориш мумкинлиги ҳақида айтишмоқда, дейилади вазирлик ахборотида.

Маълумот учун, коронавируснинг «британча» штамми 41 та, «африкача» штамми эса 7 та мамлакатда аниқлангани, Британияда учинчи локдаун эълон қилингани ҳамда Германияда коронавирус туфайли чекловлар кучайтирилгани ҳақида хабарлар берилганди.