2022 йилда Ўзбекистоннинг йирик шаҳарларида ҳам очиқ осмон остидаги муз майдонлари ташкил этилиши маълум қилинди

Тошкент шаҳридаги Алишер Навоий номидаги давлат академик катта театри олдида 7 январь куни ишга туширилган очиқ осмон остидаги муз майдони Ўзбекистонда қишки спорт турларини ривожлантиришига ва янада тарғиб этишга хизмат қилади. Бу ҳақда Туризмни ривожлантириш давлат қўмитаси раиси Азиз Абдуҳакимов 9- январь куни АОКАда бўлиб ўтган брифингдан сўнг «Дарё» мухбири Миролим Исажоновга берган қисқа интервьюсида сўз юритган.

«Хабарингиз бўлса, ушбу лойиҳа ҳукумат топшириғи билан Туризм қўмитаси, Маданият ва санъатни ривожлантириш фонди, Тошкент шаҳар ҳокимлиги ҳамда бир қанча ҳомийларимиз ёрдамида ташкил этилди. Ўйлашимча, аҳолига бу жуда ҳам ёққан бўлиши керак. Бу Тошкент шаҳрида биринчи марта ташкил қилинмоқда. Очиғини айтганда, мазкур ғояни бошқа давлатларда кўриб, бизнинг аҳоли ҳам маза қилиб, мириқиб фойдаланишларини мақсад қилган ҳолда йўлга қўйдик. Умуман олганда, бунинг яна бир чуқур маъноси борки, бу қишки спорт турларининг ривожланишига, уларни тарғиб этишга ўзига яраша хизмат қилади.

Келгуси йилда худди шундай муз майдонларини пойтахтимизнинг бир нечта нуқталарида, вилоятлар ва йирик шаҳарларда ҳам ташкил этишни режа қилиб олганмиз. Бу борада, албатта, аҳолимиз ва барча ОАВ билан маслаҳатлашамиз, уларнинг тавсияларини эшитиб, қаер уларга маъқул бўлса, ўша ерга мана шундай муз майдончалар фаолиятини йўлга қўямиз. Шуни алоҳида қайд этиш керакки, бундай майдонлар учун махсус климатик шароитлар бўлиши лозим.

Барчамиз яхши биламиз, Қозоғистонда очиқ осмон остида жуда катта муз майдони ташкил этилган. У ерга ҳам хорижлик, ҳам маҳаллий кўплаб меҳмонлар ташриф буюради. Биз ҳам мана шундай туристик объектларни барпо этишни ўйлаяпмиз», — деди Абдуҳакимов.

Аввалроқ, Тошкент шаҳридаги Алишер Навоий номидаги давлат академик катта театри олдида очилган очиқ муз майдони бир ой муддатга ўрнатилгани ҳақида хабар берилган эди. Ўттиз кун мобайнида мазкур муз майдонида қатор маданий-кўнгилочар ва спорт тадбирлари ўтказилади. Концерт ҳудудида Dance Music Fest Winter, Iosis Fest, Tashkent Rap Festival мусиқий фестиваллари, шунингдек, хоккей бўйича ўсмирлар чемпионати, муз устида рақс шоуси каби тадбирлар ўтказилиши режалаштирилган.