Тошкент, Бухоро ва Самарқанд шаҳарларида ўтказилган дрон шоулар кейинчалик об-ҳавога қараб Ўзбекистоннинг бошқа ҳудудларида ҳам ташкил этилиши кутилмоқда. Бу ҳақда Туризмни ривожлантириш давлат қўмитаси раиси Азиз Абдуҳакимов 9 январь куни АОКАда бўлиб ўтган брифингдан сўнг «Дарё» мухбири Миролим Исажоновга берган қисқа интервьюсида маълум қилди.
«2021 йилда халқимиз учун кўплаб турли янгиликлар қилишни режалаштирганмиз. Пойтахтимизда биринчи марта ташкил этилган очиқ осмон остидаги муз майдонидан ташқари, дрон шоулари орқали ҳам аҳолига хурсандчилик улашяпмиз. Бу лойиҳа илк бор Тошкент шаҳрида ташкил этилган бўлса, бугунги кунда вилоятларда ҳам уюштирилмоқда. Хусусан, Самарқанд ва Бухоро шаҳарларида ўтказилди. Кейинчалик, об-ҳавога қараб, Хива ва Нукус шаҳарлари, водий вилоятлари ҳамда бошқа ҳудудларда ҳам чиройли дрон шоуларни ташкил этиш режамизда бор. Бу ички туризмни ривожлантиришга ҳам ўзига яраша хизмат қилади», деди Абдуҳакимов.
Аввалроқ, Tashkent City боғида дрон шоу ўтказилгани, унда мусиқа садоси остида 8 хил динамик шаклни яратиш учун 500 та дрон ҳавога кўтарилгани ҳамда 30 кишилик гуруҳ назорати остида учар машиналар ёрдамида арча дарахти, совға қутиси, «2021» ва бошқа шакллар намойиш этилгани ҳақида хабар берилган эди.
Изоҳ (0)