Наманганда олий таълим муассасаларида таҳсил олаётган 20 нафар талабанинг бир йиллик тўлов-шартнома пуллари тўлаб берилди. Бу ҳақда вилоят ҳокими Шавкатжон Абдураззақов Янгиқўрғон туманида бўлиб ўтган ёшлар фестивалида маълум қилди, дея хабар бермоқда «Дарё» мухбири Азизбек Абдувалиев.
«Олдинлари ёшлар учун ҳоким тугул маҳалла раиси билан кўришиш ҳам мушкул масала эди. Мана энди барча сектор раҳбарлари ҳар ҳафта сизлар билан учрашиб, мурожаатларингизни бирма-бир эшитмоқда. Вилоятдаги эҳтиёж ва талаб юқори бўлган йўналишларда ўқиётган талабаларга йиллик контракт пулларини тўлаб бериш ташаббуси ҳам шундай мулоқотлар давомида туғилди», — деди Шавкатжон Абдураззақов.
Фестивальда Ўзбекистондаги олий ўқув юртларида ўқиётган 19 нафар ва Россияда таҳсил олаётган 1 нафар талабага йиллик тўлов-шартнома пуллари тўлангани ҳақидаги сертификатлар топширилди. Улар тиббиёт, фармацевтика, биология, математика ва дастурий таъминот йўналишларида ўқиётган йигит-қизлардан иборат.
Эслатиб ўтамиз, ўтган йили вилоятнинг Тўрақўрғон туманида ёшлар билан ўтказилган учрашувда ҳам вилоят бюджетининг қўшимча даромадлари ҳисобидан 35 нафар талабага жами 470 миллион сўмлик тўлов-шартнома пуллари тўлаб берилганди.
Изоҳ (0)