Germaniya hukumati koronavirus tufayli joriy qilingan cheklov choralarini 31-yanvargacha uzaytirishga qaror qildi. Bu haqda Germaniya kansleri Angela Merkel e’lon qildi, deb yozadi “RBK”.
Foto: AP Photo
“Biz muloqotlarni yanada qat’iyroq cheklashimiz kerak… Barcha fuqarolardan muloqotlarni mutlaq minimumgacha cheklashni so‘raymiz”, — dedi u.
Bir oy mobaynida aholi faqat oila a’zolari bilan va o‘zi bilan bitta uyda yashamaydigan faqat bitta odam bilan muloqot qilishi mumkin. Umumiy ovqatlanish joylari yopiqligicha qoladi, faqat uyga olib ketish va yetkazib berish uchungina taom sotish mumkin.
Harakatlanish ham cheklanadi. Agar bitta okrugda yetti kun ichida har 100 ming aholiga COVID-19’ga chalinish bilan bog‘liq 200 dan ortiq yangi holat qayd etilsa, mahalliy aholining o‘z uyidan uzrli sababsiz 15 kilometrdan ortiq masofaga uzoqlashishi taqiqlanadi.
Xorijdan kirib kelayotganlar uchun majburiy talab saqlanib qoladi: infeksiya tarqalishi bilan bog‘liq xavf zonalaridan qaytib kelganlar mamlakatga kirishda yoki undan 48 soat avval koronavirusga test topshirishi kerak. Shuningdek, ular uchun o‘n kunlik karantin ham amal qiladi, manfiy natija qayd etilgan taqdirda, karantindan besh kunda chiqish mumkin.
Chakana savdo yopiq bo‘lib qoladi, kundalik hayot uchun zarur do‘konlar, shu jumladan, oziq-ovqat do‘konlari, dorixonalar va Rojdestvo archalari sotiladigan joylar bundan mustasno. Sartaroshxona, kosmetik salon va shu kabi boshqa muassasalar yopiq bo‘ladi. Jamoat joylarida spirtli ichimliklar ichish taqiqlanadi.
Diniy yig‘ilishlar, ibodatlar o‘tkazish mumkin, ammo ijtimoiy masofaga rioya qilinishi va himoya vositalari taqilishi kerak.
Germaniya hukumati 25-yanvar kuni yig‘ilib, joriy vaziyatni muhokama qiladi va keyingi qarorlarni qabul qiladi.
Eslatib o‘tamiz, Germaniyada koronavirus bilan bog‘liq og‘ir vaziyat tufayli 16-dekabrdan boshlab kamida 10-yanvarga qadar davom etuvchi qat’iy lokdaun joriy etilgan edi.
Keyinroq esa Germaniyada Buyuk Britaniyada aniqlangan koronavirus shtammi bilan kasallangan ilk bemorlar qayd etilgan edi.
Robert Kox instituti ma’lumotlariga ko‘ra, Germaniyada koronavirusga chalinganlar soni 1 787 410 kishiga yetgan.
