Angliya sharqida va janubi-sharqida, shu jumladan, Londonda ham 20-dekabrdan cheklovlarning yangi, to‘rtinchi darajasi amal qilishni boshlaydi. Bu haqda Buyuk Britaniya bosh vaziri Boris Jonson ma’lum qildi, deb yozadi Meduza.

Foto: Getty Images

To‘rtinchi darajali xavf e’lon qilingan hududlarga kirish va u yerdan chiqish taqiqlangan. Bu tumanlar aholisi, alohida ehtiyoj bo‘lmasa, uyidan chiqishi mumkin emas. Birga yashamaydigan odamlar faqat ko‘chada ko‘rishishi mumkin. Eng zarur mahsulotlar bilan savdo qiladigan do‘konlar va dorixonalargina ishlashda davom etadi. Bundan tashqari, avvalroq qoidalar yumshatilib, Rojdestvoda ko‘pi bilan uchta oilaning bir joyga to‘planishiga berilgan ruxsat ham bekor qilindi.

Yangi cheklovlar kamida ikki hafta amal qiladi. Ular koronavirusning yangi turi tarqalgani tufayli joriy etilmoqda, u esa, Jonsonning so‘zlariga ko‘ra, 70 foizga yuqumliroq bo‘lishi mumkin. Hozirda Londonda qayd etilgan kasallanish holatlarining 60 foizi virusning yangi shtammi bilan bog‘lanmoqda.

20-dekabrdan cheklovlarning to‘rtinchi darajasi Uelsda, 26-dekabrdan Shotlandiyada ham amal qila boshlaydi. Shuningdek, Rojdestvo bayramlari davrida hukumat Shotlandiyaga kirish va chiqishni yopib qo‘yadi.

2020-yilning kuzida Buyuk Britaniyada cheklovlarning uch darajali tizimi joriy qilingan edi, u mintaqadagi koronavirus holatlari soniga bog‘liqdir. Bundan avvalgi, uchinchi darajali cheklovlar Londonda 16-dekabrdan kuchga kirgan edi.

19-dekabr holatiga ko‘ra Buyuk Britaniyada COVID-19’ni yuqtirib olish bilan bog‘liq 2 milliondan ortiq holat aniqlangan. Bir kecha-kunduzda bunday holatlar 27 mingtaga ko‘paygan. Pandemiya boshidan buyon mamlakatda 76 mingdan ziyod odam koronavirusdan vafot etgan.

Eslatib o‘tamiz, Jahon sog‘liqni saqlash tashkiloti koronavirus infeksiyasi pandemiyasi munosabati bilan Yevropa aholisiga Rojdestvo va Yangi yilni kutib olish uchun iloji boricha ko‘chada to‘planishni tavsiya qilgan edi.

COVID-19 bo‘yicha JSSTning maxsus vakili Devid Nabarro Buyuk Britaniyada aniqlangan COVID-19’ning yangi turi tez tarqalish xususiyatiga ega, lekin xavflilik darajasi yuqori emasligini ma’lum qilgan edi.