Ўзбекистонда янги геопортал тизими тест режимида иш бошлаши кутилмоқда. Унинг ёрдамида хавфли зоналар ва хавфли ҳудудлар картага олдиндан туширилади ҳамда огоҳлантириш тизими йўлга қўйилади. Бу ҳақда 9 январь куни АОКАда бўлиб ўтган брифингда маълум қилинди, дея хабар бермоқда «Дарё» мухбири Миролим Исажонов.
Гидрометеорология хизмати маркази бош директори Шерзод Ҳабибуллаевнинг таъкидлашича, 2021 йилдан гидрометеорология маълумотларини сотиб олиш жараёнига ўтиш режалаштирилган.
«Президентимиз Мурожаатномасидан келиб чиққан ҳолда давлатнинг иқтисодиётда улушини камайтириш мақсадида олдимизга катта бир мақсад қўйдик. Аниқроғи, ҳозирги кўрсатаётган хизматларимизни икки бараварга ҳам сифат, ҳам тушум жиҳатдан оширишни режалаштирганмиз. Шуни қайд этиш керакки, қуйи ташкилотларимиз фаолиятида ҳеч қандай хизмат кўрсатилмаган. Соҳамиз бўйича хориж давлатлари тажрибасини ўрганганимизда улардаги тушум 40-50 фоиз, ривожланган мамлакатларда эса 60 фоизгача ўзи кўрсатган хизматдан шаклланар экан. Шуни ҳисобга олган ҳолда биз ҳам қуйи ташкилотларимизнинг олдига хизмат кўрсатиш масаласини асосий мақсад сифатида қўйдик.
Гидрометеорология хизматининг асосий фойдаланувчиси — давлат ташкилотлари, йирик кластерлар, йирик фермерлар ва, албатта, инвесторлардан иборат. Жорий йилдан бор эътиборимизни кўрсатадиган хизматларимизнинг сифати ва унумдорлигини оширишга қаратмоқчимиз. 2022 йилда эса давлат томонидан бериладиган маблағни 30 фоизга камайтиришни кўзда тутганмиз. Шу орқали иқтисодиётни босқичма-босқич ривожлантирамиз. Бизнинг соҳада хусусий сектор умуман шаклланмаган, фақат давлат, яъни Ўзгидрометеорология томонидан хизмат кўрсатилади холос. Хусусий бозор ташқарида бор, аммо Ўзбекистонда мавжуд эмас. Шунинг биринчи қадамини 2021 йилда ташламоқчимиз, яъни маълумотларни сотиб олиш жараёнига ўтмоқчимиз. Бу асосий вазифаларимиздан биринчиси ҳисобланади», деди Ҳабибуллаев.
Унинг қўшимча қилишича, шу йилдан Ўзбекистон Миллий университетида Россия Гидрометеорология университетининг шу йўналишдаги факультети очилади.
Эслатиб ўтамиз, ноябрь ойининг бошларида Ўзбекистон Гидрометеорология хизмати самарали фаолият юритиш учун ходимларнинг ойлик маошлари камлиги ва малакали кадрлар кетиб қолиши каби масалаларни зудлик билан ҳал этиш лозимлигини маълум қилганди. Шу куни Президент Шавкат Мирзиёев мамлакатда гидрометеорология хизмати фаолиятини такомиллаштириш бўйича устувор вазифалар муҳокамаси юзасидан йиғилиш ўтказганди.
Изоҳ (0)