Koronavirusning yangi shtammi bolalar uchun xavfli bo‘lishi mumkin

Koronavirusning yangi shtammi tarqalishi tufayli Buyuk Britaniyadagi vaziyat ancha yomonlashishi mumkin. Bu haqda Londondagi qirolicha Mariya universiteti epidemiologiya katta o‘qituvchisi Dipti Gurdasani aytib o‘tdi, deb yozadi “RBK”.

Uning ma’lumotlariga ko‘ra, koronavirusning yangi genetik variantining tarqalish koeffitsiyenti avvalgi SARS-CoV-2’dan ko‘ra taxminan 1,74 marta yuqoriroq. Bu ko‘rsatkich bitta bemor yakkanlanish rejimiga o‘tguniga qadar o‘rtacha nechta odamga yuqtirishga ulgurishini ko‘rsatadi.

Bundan tashqari, koronavirusning “britancha” shtammi avvalgidan farqli o‘laroq, bolalar va 19 yoshgacha bo‘lgan o‘smirlar uchun ancha yuqumliroq bo‘lib chiqdi, dedi Gurdasani. Shu sababli mutatsiyaga uchragan virus kattaroq ehtimol bilan ushbu yosh guruhida simptomlarni keltirib chiqarishi mumkin, deya ogohlantirdi u. Epidemiologning so‘zlariga ko‘ra, bolalar va o‘smirlar orasidagi yuqori darajali yuqumliligi tufayli koronavirusning yangi shtammi kattalarga ham tezroq yuqishi mumkin, bu esa kasallikning tezkor tarqalishiga va o‘limlar soni oshishiga olib keladi.

“Barcha faktlar bitta narsa haqida gapirmoqda — virusning butun Buyuk Britaniya bo‘yicha tarqalishini cheklash uchun shoshilinch harakat qilishimiz kerak. Bu shtammning tarqalishiga yo‘l qo‘yib berish — variant emas. Biz maktablarni xavfsiz qilib, virus yanada yuqishining oldini olmagunimizcha, ularni yopishimiz kerak”, — dedi Gurdasani.

Avvalroq olimlar koronavirusning yangi shtammi bolalarda ko‘proq uchrayotganini ma’lum qilgan edi.

Eslatib o‘tamiz, Buyuk Britaniyada sentabr oyida koronavirusning yangi, yuqumliroq B.1.1.7 shtammi aniqlandi. Dekabr o‘rtalariga kelib, Londondagi kasallanish holatlarining uchdan ikki qismi virusning shu varianti bilan bog‘liq bo‘lib qoldi. 20-dekabrdan Britaniya hukumati yangi shtamm tufayli koronavirusga qarshi cheklovlarni kuchaytirdi.

Bundan tashqari, Buyuk Britaniya dunyoda birinchi bo‘lib COVID-19’ga qarshi AstraZeneca vaksinasidan foydalanishga ruxsat berdi. Mamlakatda ommaviy vaksinatsiya 2020-yil 8-dekabrda boshlangan.