«Қашқадарё ҳудудий электр тармоқлари корхонаси» раҳбари Янги йилни «свет»сиз кутиб олган косонликлардан узр сўради

Қашқадарё ҳудудий электр тармоқлари корхонаси раҳбари Анвар Музапов 2021 йилни шам ёруғида кутиб олган косонликлардан узр сўради. Бу ҳақда корхона масъуллари томонидан 9 январь куни бўлиб ўтган пресс-турда маълум қилинди, дея хабар берди «Дарё» мухбири.

Маълум бўлишича, «Қашқадарё ҳудудий электр тармоқлари корхонаси» раҳбарияти 2021 йил 9 январь куни вилоятдаги журналист ва блогерлар учун пресс-тур ташкил қилган.

Пресс-турда журналист ва блогерлар электр энергиясининг аҳолига қай тарзда етиб бориши ва юзага келаётган муаммоларнинг сабаблари ҳақида маълумот олган. Шунингдек, вилоят «Ҳудудий электр тармоқлари корхонаси» ишчилари фаолияти билан танишиб, электр энергиясидаги тақчиллик сабабини ўрганган.

Пресс-тур сўнгидаги давра суҳбатида сўз олган корхона раҳбари Анвар Музапов «Дарё» мухбирининг «Янги йилни электр токисиз кутиб олган косонликлар учун кимдир жавоб бердими ёки воқеа ими-жимида ёпилдими?», деган саволига жавоб берар экан, ҳолат учун ўзини айбдор санашини айтиб, косонликлардан узр сўраган.

«2020 йил 31 декабрь куни соат 21:14 да ўчган электр токини Янги йил оқшомида қайта ёқолмадик. Бу эса косонликларнинг Янги йилни ‘свет’сиз кутиб олишига олиб келди. Бунинг учун косонликлардан узр сўраймиз», — деди вилоят ҳудудий электр тармоқлари корхонаси раҳбари.

Анвар Музаповнинг маълумот беришича, Косон туманидаги асосий подстанция Косон 11035 10 КВдаги носозлик подстанция эскиргани ва масъул шахсларнинг масъулиятсизлиги сабаб содир бўлган.

«Косон нимстанциясининг қурилганига эллик йил бўлган. Айнан шу Янги йил оқшомидаги носозлик келиб чиқишига биринчи сабаб бўлса, масъул вазифага жавобгар шахсларнинг вазифасига совуққонлик қилиши ҳолатни келтириб чиқарган иккинчи сабаб бўлади. Бу ҳолатга йўл қўйган шахсларни ваколатимиздан келиб чиққан ҳолда жавобгарликка тортдик», — дейди Анвар Музапов.

Анвар Музаповнинг қўшимча қилишича, вилоятда ҳудудий электр тармоқлари корхонасига тегишли 171 та подстанция мавжуд бўлиб, уларнинг талабга жавоб бермайдиганлари бирин-кетин таъмирланади. Таъмирланадиган подстанциялар орасида Косон туманидаги асосий подстанция Косон 11035 10 КВ подстанцияси ҳам бор.

Эслатиб ўтамиз, аввалроқ Қашқадарё вилоятининг Косон туманида 25 та маҳалла Янги йил байрамини электр токисиз кутиб олгани ҳақида хабар берилганди.