Yo‘llarda shiddat bilan harakatlanayotgan, ko‘zni qamashtiruvchi dizaynga ega mashinani tasavvur qiling. Uning dvigatel ovozi yurakni junbushga keltiradi, saloni esa hashamatning eng yuksak namunasi! Ammo bunday mashinaning eng ajablanarli jihati — uning narxi. Dunyoda oddiy odam uchun tasavvur qilib bo‘lmaydigan darajada qimmat avtomobillar bor. Ular nafaqat texnologiya mo‘jizasi, balki hashamat va nufuzlilik ramzidir.
Bugungi kunda eng qimmat avtomobillarning aksariyati atigi bir necha nusxada ishlab chiqariladi, ba’zilari esa maxsus buyurtma asosida yaratilib, egasining didi va istaklariga moslashtiriladi. Quyida 2024-yilda eng qimmatbaho narxga sotilgan top-10 ta yengil avtomobillar haqida ma’lumot beramiz.
Aston Martin Valkyrie
Narxi: 3 million dollar
Britaniyaning Aston Martin kompaniyasi Red Bull Racing bilan hamkorlikda ishlab chiqqan ushbu mashina Formula 1 texnologiyalarini yo‘l avtomobiliga aylantirgan mo‘jizadir. U dunyodagi eng qimmatbaho va shubhasiz eng tez giperkarlardan biridir.
Aston Martin Valkyrie gibrid avtomobili 6,5 litrli, 12 silindrli dvigatel va 1155 ot kuchiga ega elektr motor bilan jihozlangan. Avtomobil atigi 10 soniyada 320 km/soat tezlikka chiqadi. Darhaqiqat, har bir Aston Martin Valkyrie qo‘lda yig‘ilgan bo‘lib, 150 ta nusxada ishlab chiqilgan.
Lykan HyperSport
Narxi: 3,4 million dollar
Arabistonda ishlab chiqarilgan Lykan HyperSport avtomobili 2013-yilda taqdim etilgan bo‘lib, o‘sha vaqtda dunyodagi eng qimmat avtomobillar top-10 talik ro‘yxatida uchinchi o‘rinni egallagan. Oltin bilan bezatilgan futuristik superkar 3,7 litrli ikkita turbo dvigatel bilan jihozlangan va 2,8 soniyada 0 dan 100 km/soat tezlikka chiqadi. Maksimal tezligi 395 km/soatni tashkil qiladi.
Mzakur avtomobil 2015-yilda “Forsaj” filmida suratga tushgan. Atigi 10 nusxada ishlab chiqarilgan Lykan HyperSport’ning to‘qqiztasi suratga olish vaqtida avariyaga uchragan. Qolgan birgina avtomobil AbuDabi politsiyasiga topshirilgan va u hozirgacha muzeyda saqlanib keladi.
Lamborghini Veneno
Narxi: 4,5 million dollar
2013-yilda Jeneva avtosalonida Lamborghini kompaniyasining 50 yillik yubileyiga bag‘ishlab Lamborghini Veneno taqdim etildi. “Veneno” so‘zi ispan tilida “zahar” degan ma’noni anglatadi va bu nom mashinaning qanchalik shiddatli ekanini ifodalaydi. Avtomobil 0 dan 100 km/soat tezlikka atigi 2,8 soniyada erishadi va maksimal tezligi 355 km/soatga yetadi. Lamborghini Veneno Formula 1 va Le Mans poyga mashinalaridan ilhomlangan dizaynga ega.
Dastlab kompaniya uni atigi 4 nusxani ishlab chiqardi, ulardan biri muzeyda saqlanish uchun edi, ammo keyin sotuvga yana bir nechta mashina chiqarildi. Ulardan biri 2021-yildagi kim oshdi savdosida 8,4 million dollarga sotilgan.
Bugatti Divo
Narxi: 5 million dollar
Bugatti Divo 2018-yilda Bugatti Chiron asosida yaratilgan bo‘lib, aerodinamika va boshqaruv jihatidan yanada mukammallashtirilgan superkar hisoblanadi. Mashina fransuz poygachisi Albert Divo sharafiga nomlangan bo‘lib, u 1920-yillarda Bugatti jamoasi uchun ko‘plab g‘alabalarga erishgan.
Avtomobil 2,4 soniyada va 380 km/soat maksimal tezlikka erishadi. Divo 40 nusxada cheklangan tirajda chiqarilgan va ularning barchasi deyarli bir kunda sotilgan. Qiziqarlisi, avtomobillarni yig‘ish 2021 yilgacha davom etgan. 2022-yilga kelib Dubaydagi avtosalonlardan birida Bugatti Divo 10,2 million dollarga sotilgan — bu uning asl narxidan ikki baravar qimmat.
Pagani Imola Roadster
Narxi: 6 million dollar
2023-yil noyabr oyida giperkarlar ishlab chiqaruvchi Pagani kompaniyasi o‘zining Imola modelini 8 dona cheklangan va usti ochiq versiyada taqdim etdi. Imola Roadster sakkiz sekundda 350 km/soat tezlikka erisha oladi. Uning yopiq versiyasi 5,4 million dollarga baholangan.
Pagani Imola Roadster 6.0 litrli twin-turbo V12 dvigatel bilan jihozlangan bo‘lib, u 850 ot kuchiga ega. Ushbu dvigatel Mercedes-AMG tomonidan maxsus ishlab chiqarilgan va faqat Pagani avtomobillari uchun mo‘ljallangan. Avtomobilning boshlang‘ich narxi 5.4 million dollar, ammo bozorda u10 million dollargacha baholanishi mumkin.
Pagani Huayra Codalunga
Narxi: 7,4 million dollar
Huayra modelining ushbu maxsus nashri 2022-yilda 5 dona cheklangan tirajda chiqarilgan. Pagani Huayra Codalunga dizayni 60-yillar uslubida ishlangan bo‘lib, kompaniyaning eng eksklyuziv va noyob avtomobillaridan biri sanaladi. Ushbu model 1960-yillardagi Le Mans poyga mashinalaridan ilhomlangan holda uzaytirilgan kuzov dizayni (long tail — uzun dum) va yuqori darajadagi hashamati bilan ajralib turadi.
Bugatti Centodieci
Narxi: 10 million dollar
Bugatti Centodieci — bu nafaqat zamonaviy texnologiyalar bilan jihozlangan giperkar, balki afsonaviy Bugatti EB110 modelining yangi versiyasi sifatida yaratilgan maxsus avtomobil. Centodieci italyan tilida “110” degan ma’noni anglatadi va u Bugatti brendining asoschisi Ettore Bugatti taqdim etilganining 110 yilligiga bag‘ishlab ishlab chiqarilgan.
Mazkur model faqat 10 dona ishlab chiqarilgan bo‘lib, eng kamyob va eksklyuziv modellardan biri sanaladi. Barcha zamonaviy Bugattilar singari, giperkar ham aql bovar qilmaydigan imkoniyatlarga: 1600 ot kuchiga ega W16 dvigateliga ega.
Pagani Zonda HP Barchetta
Narxi: 15 million dollar
Ushbu model 2017-yilda Horacio Pagani shaxsiy buyurtmasi asosida ishlab chiqilgan bo‘lib, atigi 3 dona yaratilgan. Bu uni dunyodagi eng noyob va eksklyuziv avtomobillardan biriga aylantiradi. Avtomobil Zonda’ning standart modifikatsiyadan ichki dizayni, kuzovning aerodinamik jihatdan yaxshilangani bilan ajralib turardi. Ammo dvigatel qismi o‘zgarishsiz qolgan — u 800 ot kuchi, 7,3 litrli V12 blokiga ega. Pagani Zonda tezligi 355 km/soatgacha yetadi.
Rolls-Royce Boat Tail
Narxi: 28 million dollar
Rolls-Royce Boat Tail millionerlar uchun yaratilgan haqiqiy san’at asari. U dunyodagi eng qimmat avtomobillardan biri hisoblanib, faqat 3 dona nusxada ishlab chiqarilgan. Har bir nusxasi mijozning shaxsiy xohishlariga mos ravishda qo‘lda o‘zgartirilgan Rolls-Royce Boat Tail narxi 28 million dollar atrofida baholanadi.
U Rolls-Royce Sweptail modelidan ilhomlangan bo‘lib, dizaynida dengiz yaxtalarining estetik elementlari aks etgan. U uzun kuzovi va yaxta shaklidagi orqa qismi bilan ajralib turadi. Qo‘lda ishlangan alyuminiy panellar har bir avtomobilni yaratishda oylab ishlov berilganining ifodasidir. Eng eksklyuziv jihatlardan biri ikki qismli “kapalak” orqa bagajga egaligidadir. Ular ochilganda ichidan piknik uchun maxsus bar va barcha kerakli ashyolar namoyon bo‘ladi.
Rolls-Royce La Rose Noire Droptail
Narxi: 32 million dollar
2024-yil holatiga ko‘ra qaysi avtomobil dunyo bo‘yicha eng qimmatbaho bo‘lgan? Bu Rolls-Royce La Rose Noire Droptail Droptail modeli. U 2023-yilda namoyish etilgan va 4 dona versiyada chiqarilgan.
Rolls-Royce La Rose Noire Droptail ulkan kabriolet bo‘lib, qizil qora rangdagi “Black Baccara” atirgulidan ilhomlanib yaratilgan. Uning ko‘zni qamashtiruvchi qizg‘ish-qora kuzovi — yorug‘lik nuriga qarab o‘zgaruvchi maxsus bo‘yoq bilan qoplangan.
Yaxta uslubidagi kuzovi Rolls-Royce Boat Tail uslubida ishlab chiqilgan. Qo‘lda yasalgan yog‘och panel — ichki va tashqi dizaynni uyg‘unlashtiruvchi eng nozik detallar bilan ishlangan. O‘ziga xos yorqin LED yoritgichlar mazkur avtomobilni Rolls-Royce kompaniyasining g‘ururiga aylantirgan jihatlardan biri hisoblanadi.
Rolls-Royce La Rose Noire Droptail kapoti ostida 6.75 litrli twin-turbo V12 dvigatel joylashgan bo‘lib, u 593 ot kuchiga ega. Avtomobil taxminan 5 soniyada 100 km/soat tezlikka chiqadi. Uning maksimal tezligi 250 km/soatdir.
Izoh (0)