Aksariyat haydovchilar hech ikkilanmasdan, qishda mashinani ustki qalin kiyim bilan haydaydi. Ammo aynan qo‘pol va noqulay kurtka yo‘l-transport hodisasi yuz berganda ko‘proq jarohat olishga sabab bo‘lishi ko‘pchilikka ma’lum emas. Bu omil, ayniqsa, bolalar uchun katta xavf tug‘diradi.
Birinchidan, qalin va qo‘pol kurtka haydovchi va yo‘lovchilarning avtomobilda harakatlanishini cheklaydi. Bundan tashqari, mashina haydash paytida xavfsizlik kamarlari tananing kerakli qismida bo‘lishiga imkon bermaydi. Buni amalda isbotlash maqsadida Germaniyaning ADAC avtomobil klubi aynan shunday vaziyatni real hayotda tatbiq etib, sinab ko‘rdi va krash-testlar (avariya sinovlari) o‘tkazdi.
Natijada to‘satdan to‘xtash vaqtida sinov mashinasining tezligi atigi 16 km/soat bo‘lganiga qaramay, qishki kiyim xavfsizlik kamarining inson tanasini to‘g‘ri himoya qilishga imkon bermadi. Bundan tashqari, ADAC ma’lumotlariga ko‘ra, bu holat jiddiy jarohat olishga, shu jumladan ichki qon ketishiga olib keladi.
Bunday holatning yechimi sifatida mutaxassislar quyidagilarni tavsiya qiladi:
- Agar havo sovuq bo‘lsa va mashinani qizdirish katta vaqt olsa, hech bo‘lmasa kurtkaning old tugmalarini bo‘shatib, keyin ulovga o‘tiring;
- Mashina haydaganda hech qachon qo‘lqop kiymang, chunki u rulni boshqarish va tezlikni o‘zgartirishda qo‘llar sirg‘anib ketishi mumkin;
- Katta hajmli qishki poyabzal hamda poshnali tuflilar pedal bilan ishlashni qiyinlashtiradi.
Izoh (0)