Gazdan noqonuniy foydalanish evaziga Andijondagi zapravka davlatga 13,8 mlrd so‘m, Farg‘onadagi mineral o‘g‘itlar sexi 6,1 mlrd so‘m zarar yetkazdi. Bu haqda ikki viloyat prokuratura organlari “Daryo”ga maʼlum qildi.
Andijon viloyati Oltinko‘l tumanida joylashgan “Oltinko‘l gaz oil” MCHJga qarashli gaz zapravka “Hududgaztaʼminot” AJ korxonasiga 13,8 mlrd so‘m zarar yetkazdi. Maʼlum bo‘lishicha, zapravka hisoblagich va o‘lchov uzellariga belgilangan tartibda plombalar o‘rnatmagan. Oqibatda 4,6 mln kub metr gazdan noqonuniy foydalangan. Mazkur holat “Hududgaztaʼminot” hamda prokuratura xodimlari hamkorligida o‘tkazgan reyd tadbirida fosh etilgan.
Gazdan o‘zboshimchalik bilan foydalanish bilan bog‘liq keyingi holat Farg‘ona viloyatida aniqlangan. Bugun, 23-iyul kuni viloyat prokuraturasi, “Hududgaz Farg‘ona” GTF va “O‘zenergoinspeksiya” xodimlari ishtirokida Qo‘qon shahar “Marg‘ilon Darvozasi” MFYda reyd tadbiri o‘tkazilgan.
Aniqlanishicha, Hojirabot 1-tor ko‘chasi 16-uyda joylashgan “XXX Fayoz” MCHJga tegishli meneral o‘g‘itlar ishlab chiqarish sexi noqonuniy ravishda tabiiy gaz tarmog‘iga ulanib, yonilg‘idan tijorat maqsadlarida foydalangan.
Qayd etilishicha, tadbirkor 2 mln 30 ming kub metr tabiiy gazdan noqonuniy foydalanib, “O‘zenergoinspeksiya” gaz taʼminot filiali manfaatlariga 6 mlrd 90 mln so‘m zarar yetkazgan. Mazkur holat yuzasidan tergovga qadar tekshiruv olib borilmoqda.
Avvalroq Toshkent viloyatida 1,9 mlrd so‘mlik tabiiy gazdan noqonuniy foydalangan tadbirkorlar aniqlangandi.
Bunday holatlar soni ortib bormoqda
Samarqand viloyatidagi korxonalardan biri 553 mln so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi.
Shuningdek, 2025-yil may oyida o‘tkazilgan tekshiruvlar natijasida isteʼmolchilar tomonidan energiya resurslaridan noqonuniy foydalanilgan 229 ta holat aniqlanib, tizimga 94 mlrd 887 mln so‘mlik zarar yetkazilgani maʼlum bo‘ldi.
Jumladan, noqonuniy foydalanishlar natijasida:
- 35,6 million kVt soat elektr energiyasi (taxminan 57,9 mlrd so‘m) va
- 13,2 million metr kub tabiiy gaz (taxminan 36,9 mlrd so‘m) talon-toroj qilingan.
Nazorat tadbirlari yakuniga ko‘ra, energiya resurslaridan foydalanish qoidalarini buzgan isteʼmolchilar bo‘yicha 448 ta maʼmuriy ish rasmiylashtirildi. Belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.
Izoh (0)