Газдан ноқонуний фойдаланиш эвазига Андижондаги заправка давлатга 13,8 млрд сўм, Фарғонадаги минерал ўғитлар цехи 6,1 млрд сўм зарар етказди. Бу ҳақда икки вилоят прокуратура органлари “Дарё”га маълум қилди.
Андижон вилояти Олтинкўл туманида жойлашган “Олтинкўл газ оил” МЧЖга қарашли газ заправка “Ҳудудгазтаъминот” АЖ корхонасига 13,8 млрд сўм зарар етказди. Маълум бўлишича, заправка ҳисоблагич ва ўлчов узелларига белгиланган тартибда пломбалар ўрнатмаган. Оқибатда 4,6 млн куб метр газдан ноқонуний фойдаланган. Мазкур ҳолат “Ҳудудгазтаъминот” ҳамда прокуратура ходимлари ҳамкорлигида ўтказган рейд тадбирида фош этилган.
Газдан ўзбошимчалик билан фойдаланиш билан боғлиқ кейинги ҳолат Фарғона вилоятида аниқланган. Бугун, 23 июль куни вилоят прокуратураси, “Ҳудудгаз Фарғона” ГТФ ва “Ўзэнергоинспекция” ходимлари иштирокида Қўқон шаҳар “Марғилон Дарвозаси” МФЙда рейд тадбири ўтказилган.
Аниқланишича, Ҳожиработ 1-тор кўчаси 16-уйда жойлашган “ХХХ Фаёз” МЧЖга тегишли менерал ўғитлар ишлаб чиқариш цехи ноқонуний равишда табиий газ тармоғига уланиб, ёнилғидан тижорат мақсадларида фойдаланган.
Қайд этилишича, тадбиркор 2 млн 30 минг куб метр табиий газдан ноқонуний фойдаланиб, “Ўзэнергоинспекция” газ таъминот филиали манфаатларига 6 млрд 90 млн сўм зарар етказган. Мазкур ҳолат юзасидан терговга қадар текширув олиб борилмоқда.
Аввалроқ Тошкент вилоятида 1,9 млрд сўмлик табиий газдан ноқонуний фойдаланган тадбиркорлар аниқланганди.
Бундай ҳолатлар сони ортиб бормоқда
Самарқанд вилоятидаги корхоналардан бири 553 млн сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди.
Шунингдек, 2025 йил май ойида ўтказилган текширувлар натижасида истеъмолчилар томонидан энергия ресурсларидан ноқонуний фойдаланилган 229 та ҳолат аниқланиб, тизимга 94 млрд 887 млн сўмлик зарар етказилгани маълум бўлди.
Жумладан, ноқонуний фойдаланишлар натижасида:
- 35,6 миллион кВт соат электр энергияси (тахминан 57,9 млрд сўм) ва
- 13,2 миллион метр куб табиий газ (тахминан 36,9 млрд сўм) талон-торож қилинган.
Назорат тадбирлари якунига кўра, энергия ресурсларидан фойдаланиш қоидаларини бузган истеъмолчилар бўйича 448 та маъмурий иш расмийлаштирилди. Белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди.
Изоҳ (0)