Toshkentda Yandex xaritalari va navigatorida svetoforning qaysi chirog‘i yonayotgani real vaqtda ko‘rish imkoniyati sinov tariqasida ishga tushirildi.
Ichki ishlar vazirligi hamkorligida amalga oshirilayotgan loyihaga dastlab poytaxtda sinovdan o‘tkazilmoqda. Bu funksiya hozircha Yandex Maps va Navigator ilovalarida Toshkentning ayrim yo‘l kesishmalarida — masalan, Amir Temur prospekti va Tiklanish hamda Gulyor ko‘chalari chorrahasida ishlamoqda. Keyinchalik bu imkoniyat butun shahar va boshqa viloyatlarga ham tarqatiladi.
Yangi funksiya haydovchilarga — hatto svetofor ko‘rinmay turgan vaziyatlarda ham (masalan, boshqa mashina tutib qolgan bo‘lsa) — uning signali haqida oldindan ma’lumot olish imkonini beradi. Yaqin vaqt ichida xizmatga taymer ham qo‘shiladi: u orqali haydovchi yashil chiroq yoqilishiga qancha vaqt qolganini ko‘ra oladi. Shuningdek, to‘xtab qolmaslik uchun svetoforlardan qanday tezlikda o‘tish kerakligini ko‘rsatish funksiyasi ham ishlab chiqilmoqda.
Kompaniya vakillariga ko‘ra, bu tajribasi kamroq haydovchilar uchun shahar harakatini soddalashtiradi hamda chorrahalardagi xavf-xatarlarni kamaytiradi. Shuningdek, haydovchilarning yo‘l rejalashtirishini yengillashtiradi, yonilg‘i sarfini ham kamaytirishga xizmat qiladi.
Izoh (0)