Millionlab muxlislar, qizil yo‘laklar, limuzinlar... Mashhurlar qo‘riqchisiz, Instagram filtrlarsiz va muxlislarsiz hayotni tasavvur qila olmaydi. Ammo ba’zan ular bunday muhitdan kechib, oddiy odamlar kabi yashashni istab qoladi. Afsuski, bu kabi urinishlar ko‘pincha kutilmagan noqulayliklar, tushkunlik va pushaymonlik bilan yakun topadi.
Foto: Kino.mail.ru
Naomi Uotts va supermarketdagi paparatsilar hujumi
2007-yilda Naomi Uotts farzandli bo‘lgach, shunchaki oziq-ovqat do‘koniga borishga qaror qiladi va Los Anjelesdagi ekologik marketga yo‘l oldi. Biroq u yerning har burchagidan paparatsilar chiqib keladi: kimdir oynalardan, boshqalar esa javonlar orasidan kameralarini aktrisaga qaratadi. Oddiy kiyimda uyidan chiqqan va hayratga tushgan Uotts salkam 30 ta paparatsini do‘kondan chiqarish uchun politsiya chaqiradi. So‘ng uning dugonasi mashinasini do‘kon eshigigacha haydab kelgach, aktrisani qutqaradi.
Kevin Beykon va “Ko‘rinmas odam” niqobi
“Umuman ko‘rinmas odam bo‘lib qolsa-chi?” degan fikr mashhurlikdan charchagan aktyor Kevin Beykonning xayoliga kelgach, u bir tajriba qilishga qaror qiladi. Maxsus effektlar ustasi yordamida qalin protez tayyorlab, soxta burun, egri tishlar, ko‘zoynaklari bor niqob bilan ko‘chaga chiqadi.
“Yangi” Kevin savdo markaziga borganida uni hech kim tanimaydi. Ammo kutilgan erkinlik o‘rniga aktyor sovuqqonlik va qo‘pol munosabatni qabul qiladi. Odamlar uni sezmay, turtib ketishadi, yo‘l bermaydi va hatto yomon so‘zlar aytib o‘tib ketadi.
“Bu mutlaqo yoqimsiz tajriba bo‘ldi. Shundan so‘ng men yana mashhur bo‘lishni istab qoldim”, degan edi u keyinroq.
Gvinet Peltrou va plus-size ko‘rinishdagi tajriba
Aktrisa Gvinet Peltrou “Sevgi ko‘zni ko‘r qiladi” filmidagi rolida ortiqcha vazni bor qilib ko‘rsatuvchi maxsus kostyum kiyishga majbur edi. Kunlarning birida aktrisa o‘sha kostyumda tashqariga chiqishga qaror qiladi. Tribeca Grand mehmonxonasining hashamatli foyesiga kirganida, Peltrou o‘ziga qaratilgan sovuq va befarq nigohlarni sezadi.
“Atrofdagilarning bunday qarashlari va meni mensimasliklarini his qilish juda og‘ir kechdi”, degan edi u intervyulardan birida. Hurmat o‘rniga befarqlikni ko‘rgan aktrisa qayta bunday tajriba qilmaslikka qaror qilgan.
Teylor Momsen va “‘Grinch’dagi qizaloq” laqabi
“Grinch: Yangi yil o‘g‘risi” filmidagi shirin qizaloq — Sindi Lu obrazini gavdalantirgan Teylor Momsen maktabda oddiy hayot bilan aktyorlik faoliyatini uyg‘unlashtirishga harakat qiladi. Biroq bu qaror unga qimmatga tushadi.
“Maktabda hatto ismimni ham hech kim bilmas edi. Men shunchaki ‘Grinch’dagi qizcha edim”, deya eslaydi u.
Yangi maktabga o‘tish ham aktrisaga najot bermadi: do‘stlar orttirish istagi barbod bo‘ldi, atrofdagilar hasadi va qabul qilmasligi esa yosh aktrisaning o‘ziga bo‘lgan ishonchini susaytirdi. Natijada oddiy bolalik unga nasib etmadi.
Sheron Stoun va Tinder tarmog‘idagi tajriba
Aktrisa Sheron Stoun tanishuv ilovasi orqali o‘z juftini izlab ko‘rmoqchi bo‘ladi. Ammo uning akkaunti tezda bloklandi. Chunki foydalanuvchilar uni haqiqiy Sheron Stoun ekaniga ishonmaydi. Ilova vakillari esa shunday deb izoh beradi: “Siz juda go‘zal ayolsiz, bunday aktrisaning tanishuv saytlarda o‘tirishi ishonib bo‘lmaydigan holat”.
Natijada virtual tanishuv orqali o‘z baxtini izlagan Stounning bu safar ham omadi kelmaydi.
Izoh (0)