Zamonaviy seriallar tobora g‘ayrioddiy syujetlar va janrlar aralashmasi orqali tomoshabinlarni hayratda qoldirmoqda. Ayniqsa, oxirgi yillarda detektiv va fantastika janrlari birlashib, mutlaqo yangi, kutilmagan olamlarni namoyish etmoqda. Ana shunday seriallardan iborat to‘plamni e’tiboringizga havola qilamiz.

“Narigi dunyodan kelgan detektivlar”

• AQSH, 2024-yil.
• Detektiv, fantastika, komediya.
• Davomiyligi: 1 fasl.
• IMDb reytingi: 7,5.

Edvin va Charlz vafot etgan bo‘lsa-da, narigi dunyoga ketishni rad etib, Yerda arvoh sifatida qolishadi. Ular birgalikda detektiv agentlik tashkil etishadi. Xotirasini yo‘qotgan qiz bilan birga qahramonlar AQShda turli ishlarni tekshirishadi. Uylariga qaytishlariga esa mushuklar qirolining o‘zi to‘sqinlik qiladi.

Serial Nil Geymanning aynan shu nomdagi komiksiga asoslangan va uning uslubini to‘liq aks ettiradi: “Narigi dunyodan kelgan detektivlar” hazil, drama, sirlilik va chalkash voqealarni o‘zida mujassam etgan.

“Xaos”

• Buyuk Britaniya, 2024-yil.
• Drama, komediya, fantastika.
• Davomiyligi: 1 mavsum.
• IMDb: 7,4.

Ma’bud Zevs haddan tashqari shubha-gumondan aziyat chekib, har yerda fitna-fasodlarni ko‘radi. U o‘z tashvishlarini o‘zi qoyaga zanjirlab qo‘yishni buyurgan Prometeyga aytadi. Shu payt mashhur sozanda Orfey sevgilisini yo‘qotib, uning ortidan marhumlar saltanatiga borishga tayyor turadi. Yerda esa to‘s-to‘polon ko‘tariladi: xudolarga bag‘ishlangan haykalning ochilish marosimida uni buzg‘unchilar shikastlagani ma’lum bo‘ladi.

“1899”

• Germaniya, AQSH, 2022 yil.
• Drama, triller, fantastika.
• Davomiyligi: 1 mavsum.
• IMDb: 7,3.

1899-yilda “Serber” kemasi Yevropadan AQShga yo‘l oladi. Bundan to‘rt oy oldin xuddi shu kompaniya kemasi dengizda g‘oyib bo‘lgan edi. Sayohatning o‘rtalarida “Serber” ekipaji g‘alati signal qabul qiladi va bu ko‘plab xavfli voqealarning boshlanishiga sabab bo‘ladi.

“1899” serialini afsonaviy “Zulmat”ni yaratgan er-xotin Yante Frize va Baran Bo Odar yozgan va suratga olgan. Ammo avvalgi loyiha faqat Germaniyaga bag‘ishlangan bo‘lsa, yangi serialda turli millatga mansub aktyorlar jamoasi ishtirok etgan: qahramonlar ingliz, nemis, polyak, fransuz va boshqa tillarda so‘zlashadi. Serial syujeti triller, drama va fantastika janrlarini o‘zida mujassam etgan. Biroq shou birinchi mavsumdan so‘ng to‘xtatildi va voqealar rivoji yakunlanmay qoldi.

“Murda”

• Buyuk Britaniya, 2023 yil.
• Detektiv, fantastika.
• Davomiyligi: 1 mavsum.
• IMDb: 7,3.

London politsiyasi ko‘chada murda topadi: erkakning ko‘ziga o‘q otilgan, biroq na o‘q, na chiqish teshigi mavjud. Bundan tashqari, murda butunlay yalang‘och, tanib olish belgilaridan faqat g‘alati tatu bor. Asosiy jumboq shundaki, aynan bir xil murda to‘rt xil davrda — 1890, 1941, 2023 va 2053-yillarda — bir joyning o‘zidan topiladi. Politsiyachilar bir-birlarining mavjudligini bilishmaydi, ammo g‘ayritabiiy hodisaga duch kelganlarini tushunishadi.

“Dekameron”

• AQSH, 2024 yil.
• Drama, komediya, tarixiy.
• Davomiyligi: 1 mavsum.
• IMDb: 6,4.

XIV asrda Italiyani vabo epidemiyasi qamrab oladi. Boylar uylarida jon saqlashga urinadi, ammo birin-ketin halok bo‘ladilar. Bir nechta zodagonlarga vikont Leonardodan taklifnoma keladi. U ularni o‘z mulkida eng og‘ir kunlarni o‘tkazishga taklif qiladi. Natijada vikontning qasrida yashiradigan sirlari bor odamlar to‘planadi. Faqat Leonardoning o‘zi allaqachon hayotdan ko‘z yumgan edi.

“Kopengagenlik kovboy”

• Daniya, 2022-2023-yillar.
• Drama, jinoyat, fantastika.
• Davomiyligi: 1 mavsum.
• IMDb: 6,7.

Nozik qiz Miu tilsim sifatida foydalaniladigan sirli shaxs. Ba’zida u qasos farishtasiga ham aylanishi mumkin. Uni bir fohishaxona egasining qarindoshi sotib oladi. Keyinchalik Miuning dugonasi halok bo‘lgach, u atrofdagilardan o‘ch ola boshlaydi.

Filmda voqealar sekin rivojlanadi va ba’zida ikkinchi o‘ringa tushib qoladi. Asosiy e’tibor esa neon nurlari bilan to‘lgan go‘zal kadrlarga va dahshatli shafqatsizlikka qaratilgan.