Bred Pitt bosh rolni ijro etgan “F1” (“Formula 1”) filmi jahon kinoprоkatida o‘n kun ichida 293 million dollar daromad keltirdi va Apple’ning eng ko‘p kassa yig‘gan kartinasiga aylandi, deb xabar bermoqda Variety.
Filmni ishlab chiqarish uchun reklama byudjetini hisobga olmaganda 250 million dollar sarflangan. Odatda prokatda o‘zini oqlash uchun kartina o‘z byudjetidan 2,5 baravar ko‘p daromad keltirishi kerak, bu holda reklama xarajatlari qoplanadi va kinoteatrlarga boradigan mablag‘ning bir qismi ham hisobga olinadi, deb yozadi Screen Rant.
Maqolada ta’kidlanganidek, rekord o‘rnatish unchalik qiyin bo‘lmagan. Apple jahon kinoprokatiga atigi beshta kartina chiqargan, ulardan ikkitasi muvaffaqiyatsizlikka uchragan — bular Skarlett Yoxansson va Chenning Tatum ishtirok etgan “Menga Oyni ko‘rsat” hamda Genri Kavill qatnashgan “Argayl: Superjosus” filmlaridir. Birinchi lenta jahon prokatida 42 million dollar, ikkinchisi esa 96 million dollar yig‘gan. Qolgan ikki loyihaning kassa yig‘imi biroz yuqoriroq. “Gul oy qotillari” filmi hisobida 158 million dollar mavjud. Rejissyor — Martin Skorseze, bosh rolni Leonardo Di Kaprio ijro etgan. Ridli Skottning “Napoleon” filmi kassasi 221 million dollarni tashkil etgan. Tasmada fransuz imperatori obrazini Xoakin Feniks gavdalantirgan.
Pittning aytishicha, u “F1” filmi suratga olishiga tayyorgarlik ko‘rish jarayonida poyga mashinalarida 6 ming mildan (9 656 km) ortiq masofa bosishga majbur bo‘lgan. U istiqbolli yangi haydovchi Joshua Pirsga (Demson Idris) ustoz sifatida poyga olamiga qaytgan sobiq poygachi Sonni Xeys rolini ijro etdi. Filmda shuningdek, Xaver Bardem, Kerri Kondon va Tobayas Menzis ham rol o‘ynagan.
Film ishonarlilik va tabiiylikka erishish uchun aktyorlar “Formula 1” poygachilari, jumladan, yetti karra jahon chempioni Lyuis Xemilton (filmnning prodyuserlaridan biriga aylangan) bilan hamkorlik qilishdi. Rejissyor — Jozef Kosinski. U bir yil davomida kadrlar rejasini tuzish bilan shug‘ullangan, uning filmidagi deyarli barcha sahnalar haqiqiy voqealardan ilhomlanib olingan. Asosiy epizodlar butun dunyo bo‘ylab “Formula 1” trassalarida suratga olingan.
Izoh (0)