Yulduzlar ishtirokidagi reklama har doim daromad va mashhurlik keltiradigandek tuyuladi, ammo bu har doim ham shunday bo‘lavermaydi. Bugun biz brendlar uchun muammolar keltirgan reklama loyihalarini esga olamiz. Reklama brendlar hayotining muhim qismidir. Mahsulot, syujet, vizual, taniqli shaxs — reklamaning har bir jihati mayda-chuydasigacha puxta o‘ylanadi. Biroq baʼzida Pepsi va Nivea kabi yirik kompaniyalarda ham muvaffaqiyatsizliklar yuz beradi. Mashhur kompaniyalar tarixida “dog‘” qoldirgan shov-shuvli reklama aksiyalari to‘plamini tayyorladik.

Kendall Jenner va Pepsi reklamasi

Kendall Jenner ishtirokidagi Pepsi reklama roligi 2017-yilda efirga uzatildi va darhol tanqidlar to‘foniga uchradi. Reklamada model suratga olinayotgan bo‘lsa, orqa fonda irqiy tengsizlikka qarshi ko‘cha namoyishi ko‘rsatiladi. Jenner suratga olishni to‘xtatib, faollarga qo‘shiladi. U hamma bilan birga Pepsi ichadi, oxirida esa politsiyachiga ichimlik uzatadi — u jilmayadi, baxtli yakun, hamma raqsga tushadi.

Kompaniya inqilobiy obrazlardan foydalanib pul ishlashda va ijtimoiy muammolarni soddalashtirishda ayblandi. “Dunyoni bir banka shirin gazli ichimlik bilan qutqarib bo‘lmaydi,” deb yozishdi ijtimoiy tarmoqlarda.

Dastlab Pepsi vakillari o‘zlarini himoya qilishga urinishdi, biroq keyinchalik xatolarini tan olishdi. “Shubhasiz, biz xato qildik va buning uchun uzr so‘raymiz,” deyishdi ular. Rolik olib tashlandi va uning tarqatilishi to‘xtatildi. Kendall izoh bermadi, lekin reklama kampaniyasi haqidagi barcha postlarini o‘chirib tashladi.

Gal Gadot va Huawei

2019-yilda Huawei Gal Gadot bilan hamkorlikda reklama taqdim etdi. Rang-barang rolik Huawei P30 smartfonlarining yangi modeli afzalliklarini namoyish qildi. Hammasi yaxshi edi, biroq aktrisa kampaniyaning promo-tvitlarini... iPhone orqali joyladi.

Bu nozik jihatga bir youtuber eʼtibor qaratdi. U reklamaning skrinshotini “Gal Gadot Huawei reklamasida... ammo iPhone bilan yozadi. Qanday ajoyib...” degan izoh bilan joyladi. Asl post tezda o‘chirildi, ammo skrinshot tarmoq bo‘ylab tarqalib ketdi — kompaniyaning obro‘siga putur yetdi.

Emma Watson va Burberry

2010-yilda Emma Burberry bahor-yoz kolleksiyasining yuz timsoliga aylandi. “Garri Potter” yulduzi mashhur fotograf Mario Testino bilan ishladi — bu suratga olish tarixga kirishi mumkin edi. Biroq kadrlardan birida Emmaning oyog‘i yo‘qolib qoldi. Fotomuharrirning xatosini payqashmadi va suratni reklamaga o‘tkazib yuborishdi.

Kadr internetda tarqalib, ko‘plab kinoyali savollarga sabab bo‘ldi. Ammo na Watson, na Mario bu haqda hech qanday izoh berishdi. Buning o‘rniga Emma suratga olish jarayonidan olgan taassurotlari haqida video post joyladi. Burberry ham hech qanday izoh bermadi, kadrni o‘chirib tashlamadi — uni hozir ham internetda topish mumkin.

Rihanna va Nivea

Nivea ning Rihanna bilan hamkorligi ijobiy tarzda boshlandi. Pop-yulduz 2011-yilda brend yuz timsoliga aylandi — kompaniya uning turnesiga homiylik qildi va “California King Bed” qo‘shig‘ini o‘z reklamasida qo‘lladi. “Rihanna bizni qo‘llab-quvvatlayotganidan xursandmiz,“ — dedi Nivea vakili Markus Pinger.

Biroq bir yil o‘tar-o‘tmas xonandani... haddan tashqari hayratomuz xatti-harakat sababli ishdan bo‘shatishdi. Brendning yangi rahbari Stefan Haydenrayx Riannani “juda ham jozibador” deb topdi va uning hayot tarzi Nivea uchun mos kelmasligini taʼkidladi. “Nivea qanday qilib u bilan bog‘lanishi mumkinligini tushunmayapman,” dedi u.

Rianna sukut saqladi, ammo o‘z ijtimoiy tarmoqlaridagi sahifalarida Stefanning suratini “izoh shart emas” degan kinoyali sharh bilan joyladi.

Mashhur shaxs bilan hamkorlik qilish hali muvaffaqiyat kafolati emas. Brendlar taniqli insonlarga eʼtibor qaratishadi, biroq reklama kampaniyasi baribir kutilganidek bo‘lmay qolishi mumkin. Nozik jihatlar ko‘p: goh fotoshopning meʼyordan oshishi, goh o‘rinsiz epatajilik yoki ijtimoiy muammolar zaminidagi janjallar tufayli, reklama yutuqlaridan zavqlanish o‘rniga tushuntirish berish va uzr so‘rashga to‘g‘ri keladi.