Yulduzlar barcha rasmiy tadbirlarga va qizil yo‘laklarga tashrif buyurishda professional stilistlar tomonidan tayyorlanishiga qaramay baʼzida muvaffaqiyatsizlikka ham uchrab turadilar. Stilistning kichik xatosi ham yulduzning obro‘siga putur yetkazishi mumkin. Gollivud mashhurlariga qizil yo‘lak masxara maydoniga aylanib qolmasligi uchun ular o‘z obrazidagi har bir elementni o‘ylab ko‘rishlari kerak. Quyida Gollivud mashhurlarining qizil yo‘laklarda sodir bo‘lgan eng shov-shuvli va janjalli byuti-muvaffaqiyatsizliklarini to‘pladik.
Madonna va uning “Gremmi”dagi g‘alati yuzi
Pop yulduzning omma oldiga har bir chiqishi butun bir voqea bo‘lib, u bir necha kun davomida ommaviy axborot vositalarida muhokama qilinadi. 2023-yilda Madonna “Gremmi” mukofotiga qora kostyum va maksi yubkada tashrif buyurdi. Uning yorqin qiyofasi to‘q ko‘k poshnali tuflilar bilan to‘ldirilgan holda shov-shuvga sabab bo‘lishi kerak edi. Ammo diqqat markazida qo‘shiqchining libosi va hatto musiqiy yutuqlari ham emas edi. Odamlar tashqi ko‘rinishdagi aniq o‘zgarishlarni muhokama qila boshladilar.
Madonna sahnada juda shishgan yuz va uning g‘ayritabiiy nisbatlari bilan paydo bo‘ldi. Muxlislar xonandaning fillerlar bilan to‘ldirilgan yuzini zo‘rg‘a tanidilar. Muvaffaqiyatsiz operatsiyalar haqida internetda qizg‘in bahslar boshlandi. Plastik jarrohning buni fosh qilishi esa olovga moy sepdi.
Madonna ijtimoiy tarmoqlarda bu holatga izoh berib, “shishgan” yuz effekti yomon rakurslar va kamera obyektivi tufayli yuzaga kelganini taʼkidladi. U plastik aralashuvlar faktini inkor etmadi, lekin tafsilotlarga urg‘u bermadi. “Agar sizni ig‘vogar va xavfli deb atashsa, demak, siz hamma narsani to‘g‘ri qilyapsiz”, dedi u, chunki janjallar har doim uning imijining bir qismi bo‘lgan.
Kristina Agilera sunʼiy qorayish qurboni
2000-yillarning o‘rtalarida Kristina Agilera norasmiy ravishda avtozagar ambassadori hisoblanardi. Gollivud yulduzi hech qachon omma oldiga zagarsiz chiqmagan, jozibali “plyaj” ko‘rinishi pop qo‘shiqchining o‘ziga xos imzosi edi.
Vaqt o‘tmoqda, trendlar o‘zgarmoqda, ammo Agilera hamon avtozagarlar va bronzatorlardan voz kechganicha yo‘q. Bir safar omma oldiga chiqish paytida xonanda issiq havo tufayli juda terlab ketdi, natijada tana bo‘ylab surtilgan bronzator oqib tushdi. Buni eʼtiborli tomoshabinlardan yashirishning iloji bo‘lmadi — suratlar memlarga aylanib ketdi. Mish-mishlarga ko‘ra, bu voqeadan keyin Kristina Agilera tanada uzoq vaqt saqlanadigan kuchli qoraytirish vositalariga o‘tgan.
Demi Mur Fendi ko‘rgazmasida — muzlatilgan yuz
2021-yilda Demi Mur Parij moda haftaligi doirasida o‘tkazilgan Fendi ko‘rgazmasini nafis qora libosda ochdi. Ammo kutilgan olqishlar o‘rniga tomoshabinlar hayratdan qotib qolishdi. Aktrisaning o‘zgarib ketgan yuzini ko‘rgan hamma bir zumda uning kiyimini unutdi. Gollivud yulduzini shunchaki tanib bo‘lmasdi: go‘yo kesib olingandek o‘tkir yonoqlari va g‘ayritabiiy ko‘tarilgan yuqori labi barchani hayratda qoldirdi.
Ijtimoiy tarmoqlar bu haqidagi izohlardan portlab ketdi. Sharhlovchilar salbiy fikrlarini uyalmay aytishdi, aktrisani haqorat qilishdi va uni yosharishga bo‘lgan muvaffaqiyatsiz urinishlarda ayblashdi. Demi Mur muxlislarni tinchlantirishga harakat qildi: uning g‘alati yuzi plastik jarrohlarning aralashuvi natijasi emas, balki vizajistlarning tajribasizligi edi.
Keti Perri va oq qoshlar tajribasi
Keti Perri tashqi ko‘rinishidagi yorqin o‘zgarishlarga bo‘lgan muhabbati bilan tanilgan. 2016-yil u mashhur Met Gala balida Prada brendining baxmal ko‘ylagi va minorasimon baland soch turmagi bilan eʼtiborni tortgan bo‘lsada, uning rangsiz qoshlari ko‘proq izohlarga sabab bo‘ldi. Yorqin makiyaj va oqartirilgan qoshlar fonida ko‘zlar yo‘qolib ketgandek tuyuldi. Natijada Keti Perri g‘alati ko‘rinardi. Hatto ijtimoiy tarmoqlardagi uning sodiq muxlislar ham Keti “haddan oshib ketgan” deb izohlar qoldirishdi. Xonanda tashqi ko‘rinishi haqida tushuntirish bermadi, lekin tez orada quyuq qoshlar va rangli bo‘yanish bilan yana klassik uslubiga qaytdi.
Anjelina Joli — yuzdagi oq upa
2014-yilda “Oddiy yurak” filmining premyerasida Anjelina Joli yuzida unni eslatuvchi oq izlar bilan porladi. Aktrisa go‘yoki oshxonadan qizil gilam to‘shalgan yo‘lakka o‘tgandek bo‘ldi. Oddiy yorug‘likda uning pardozi benuqson ko‘rinardi, biroq fotoapparat chirog‘i yoqilishi bilanoq, sochiluvchan pudra (upa) kukuni butun go‘zalligi bilan namoyon bo‘lardi.
Uning vizajisti yorqin yorug‘likda pardoz qanday ko‘rinishini shunchaki hisobga olmagan. Bu xato bir zumda virusga aylandi: suratlar ijtimoiy tarmoqlarda tarqalib, memlar va masxaralar to‘lqinini keltirib chiqardi. Sharhlovchilar aktrisaga stilistni zudlik bilan almashtirishni maslahat berishdi. Tez orada bu tuzoqqa boshqa mashhurlar ham tushdi: Kim Kardashyan, Nikol Kidman, Yeva Longoriya va Uma Turman ham upali yuzda omma oldida paydo bo‘lishdi.
Tashqi ko‘rinish katta rol o‘ynaydigan sanoatda, hatto kichik xatolar ham qimmatga tushishi mumkin. Yulduzlarning hech biri tasodifiy xato uni kulgiga aylantirib qo‘yishidan kafolatlanmagan.
Izoh (0)