Aktrisa va dizayner Shahzoda Muhammedova hayoti, onalik hamda turmushdagi sinovlar haqida gapirib berdi.
Oxirgi vaqtlarda faqat ona bo‘lib qoldim. Ikki nafar farzand bilan hayot oson emas ekan. 3–4 nafar farzandi bor ayollar qanday uddalaydi, hayron qolaman. Onalik mas’uliyati hayotimning yarmidan ko‘pini egallab turadi, deydi aktrisa
Turmushidagi sinovlar haqida esa aktrisa quyidagicha so‘z yuritdi.
Turmushimizning dastlabki yillari oson kechmagan. O‘zbekistonga kelganimizda uysiz edik, ijarada yashaganmiz. Avvaliga bir xonali, keyinchalik ikki, so‘ng uch xonali uyga o‘tganmiz. Shunday qilib asta-sekin o‘sib bordik. Turmush o‘rtog‘imni hayotda ikki marta ko‘rib, turmushga chiqqanman. Birinchi suhbatdayoq qanday insonligini sezganman. “Menga turmushga chiqmasdan, keyin afsuslanib qolmang” deganlarida, ichimda haqiqatda afsuslansam-chi? degan xavotir bo‘lgan va rozi bo‘lganman, deydi aktrisa.
Shahzoda oilaviy hayotda o‘zaro ishonch va sabr muhimligini ham ta’kidladi.
Erimga “meni sensirab gapirmang” deganman. Men uchun erkak ayolga hurmat bilan sizlab murojaat qilishi kerak. Agar biroz jahl bilan, balandroq ovozda “sen” deb gapirsa, bu menga yoqmaydi, og‘ir eshitiladi. Aksincha, shunday vaziyatda ham “siz” deb gapirsa, gap qattiq bo‘lsa ham yengilroq qabul qilinadi. Shu sababli undan doimo sizlab gapirishini so‘raganman, deydi aktrisa.
Turmushdagi kelishmovchiliklar
Shahzoda Muhammedova turmushining ilk yillarida faqat hissiy emas, moliyaviy jihatdan ham sinovli davrlar bo‘lganini yashirmaydi. Uning aytishicha, turmush o‘rtog‘i bilan ba’zida qarorlar borasida kelishmovchiliklar ham bo‘lgan.
Boshlanishida biz ham ko‘p kelisholmagan paytlarimiz bo‘lgan. Meni ham o‘z orzu-havaslarim bo‘lgan, lekin sabr qilganman. Turmush o‘rtog‘imga nisbatan ishonchim baland edi. Topgan daromadimizni bitta seyfga yig‘ardik. Bir kuni turmush o‘rtog‘im “bu pulni biznesga tikmoqchiman”, dedi. O‘shanda topgan pulimga ichim achigan “yo‘q, men rozimasman, hali uyimiz yo‘q, ish o‘xshamasachi” deb xavotir olganman. Turmush o‘rtog‘im “Siz menga ishonmayapsizmi? Men yetti o‘lchab, bir kesadigan odamman”, deb aytgan. Keyin men mayli oling deb pulni berganman, deydi u.
Afsuski, aktrisa bu biznes o‘xshamaganini ham ta’kidladi.
Shahzoda Muhammedova turmush o‘rtog‘i bilan boshidan oson yo‘l bosib o‘tmaganini ochiq tan oladi. Ularning hayotida sabr bilan qurilgan oila hikoyasi mavjud.
Bir umr Moskvada qolib ketamanmi, deb rosa yig‘laganman. Vatan sog‘inchi bilan depressiyaga tushganman. Keyin turmush o‘rtog‘im “Mayli, O‘zbekistonga qaytamiz, lekin ko‘chishimiz bilanoq ishim yurishib ketmasligi mumkin, yuzimga solmaysizmi?”, degan. Men esa “yo‘q, sabr qilaman”, deb dalda berganman, har doim qo‘llab quvvatlaganman, deydi u.
Shu davrda turmush o‘rtog‘i Shahzodaning holatini ko‘rib, O‘zbekistonga qaytishga qaror qilgan.
Shahzoda aytishicha, turmush o‘rtog‘i oddiy lavozimdan boshlab, asta-sekin o‘zini ko‘rsatgan va hozirda mas’uliyatli rahbarlik darajasiga yetgan.
Har doim bir-birimizni to‘ldirib yashaganmiz. Bizga oson bo‘lmagan, lekin sabr, qo‘llab-quvvatlash va ishonch orqali hozirgi holatimizga yetdik, deydi Shahzoda Muhammedova.
Shuningdek, u ayol va erkak o‘rtasidagi muvozanat haqida ham o‘z fikrini bildirib o‘tdi.
Ba’zida oilada ayol kuchliroq bo‘lsa, u boshchilikni qo‘liga oladi. Buvim ham shunaqa bo‘lgan — buvamdan ko‘ra bilimli va mehnatsevar edi. Bu kabi holatlarda erkak va ayol roli almashib qolgandek bo‘ladi, bu esa tushunmovchiliklarga sabab bo‘ladi, deydi dizayner.
Ko‘pchilik Shahzoda Muhammedovani avvalo aktrisa sifatida tanisa-da, u ijodiy faoliyatini aslida dizaynerlikdan boshlagan. Unga dastlab buvisi ishxonasining ikki qavatini ishonib topshirgan. Shahzoda faqat ikki dona tikuv mashinasi bilan kichik atelyesini yo‘lga qo‘ygan va mijozlari asta-sekin ko‘paygan. Keyinchalik mashinalar soni ham ortib borgan. U ishini oddiylik va kichik qadamlar bilan boshlaganini ta’kidlaydi.
Shogirdlar — faxr va ilhom manbai
Shahzoda Muhammedova nafaqat san’atkor, balki tajribali ustoz sifatida ham faol. U 17 yildan beri yosh dizaynerlarni tayyorlab kelmoqda. Bu yillar davomida minglab shogirdlar uning qo‘l ostida bilim olib, o‘z yo‘lini topgan.
Dizaynerlik faoliyati haqida gapirar ekan, Shahzoda o‘z shogirdlari haqida faxr bilan to‘xtaldi:
Shogirdlarim hozirda xorijda — Milan, Parijda moda namoyishlarida qatnashyapti, milliy matolarimizni dunyoga tanityapti. Bu men uchun katta faxr.
17 yildan beri o‘qitaman. Bu vaqt ichida minglab shogirdlarim bo‘lgan. Albatta, ularning hammasi shu yo‘nalishda qolmagan. Ba’zilarining ota-onasi majburlab yuborgan, ammo haqiqiy qiziqish bilan kelgan yoshlar ham ko‘p. Orzusi dizaynerlik bo‘lganlar bugun o‘z yo‘lini topgan.
Shogirdlarim orasida har xil yoshlar bo‘lgan. Ba’zilarini ota-onalari majburlab olib kelgan, lekin orasida bolaligidan dizayner bo‘lishni orzu qilib, bu sohaga qiziqib kelganlar ham bor. Men uchun eng katta mukofot — bu sohaga chin dildan oshno bo‘lgan yoshlarning yutuqlarini ko‘rish, deydi dizayner Shahzoda Muhammedova.
Ayolning sabri va ishonchi oilani bir butun saqlaydi
U o‘z munosabatlaridagi murakkabliklarni, erkak va ayol o‘rtasidagi kuchlar muvozanati haqida to‘xtaldi.
Sen ishlab o‘zingdan ketib qoldingmi, bo‘ldi ishxonangni yopasan, degan gap bo‘lgan. Yevropada ham shunaqa holatlar bo‘ladi menimcha. Ayol ishlayotgani uchun, uyni to‘lovlariga yordam bergani uchun tili uzun bo‘lib qoldi deb o‘ylarkan erkak. Shunaqa vaqtlarda men og‘ir bosiq bo‘lganman. Turmush o‘rtog‘imga dalda berib ularni doim qo‘llab quvvatlaganman. Siz O‘zbekistondagi eng zo‘r quruvchilardan bo‘lasiz deganman. Kichik bir yutug‘iga ham chin dildan quvonib, “vau” deb emotsiya bilan fikr bildirganman, deydi dizayner.
Shahzoda ayrim paytlarda munosabatlar borasida ikkilanishlar bo‘lganini yashirmadi.
Ba’zida ajrashib ketmasmikanmiz, noto‘g‘ri insonni tanlab qo‘ymadimmikan degan xayol o‘tgan. Yangi turmush qurgan vaqtimiz Moskvada alohida yashaganmiz. Turmush o‘rtog‘im qaynonani ham, qaynotani ham o‘rnini bosadigan inson, juda qattiq, xarakteri og‘ir, deydi u.
Hayotda har xil vaziyatlar bo‘ladi, ammo vaqt o‘tishi bilan bir-birlarini yaxshiroq tushuna boshlaganlar. Bu esa har qanday munosabatda muhim ahamiyatga ega bo‘lgan.
Men qizimni 3 yoshgacha ona suti bilan emizdim. O‘g‘limni esa bolalar bo‘tqasi bilan boqdim. Ko‘pchilik ona suti bilan katta bo‘lgan bola baquvvat, sog‘lom, immuniteti yuqori bo‘ladi deyishadi. Lekin o‘g‘limga qaraganda qizim ko‘p kasal bo‘lgan. Qayerga borsam qizimni o‘zim bilan birga olib borganman, to‘yga, bayram, konsertlarga ham deydi, Shahzoda Muhammedova.
Shahzoda 12 yil davomida buvisiga tegishli ikki qavatli joyda o‘zining atelyesini yuritgan. Dizaynerlik faoliyati ham aynan shu yerda boshlangan. Biroq turmushga chiqqach, oilaviy hayot sabab bu joyni tark etib, ijaraga chiqishga majbur bo‘lgan. U ijara uyda yashashning moliyaviy va hissiy jihatdan naqadar og‘ir bo‘lganini ham yashirmaydi.
Odamlarga ishonch yo‘q
Buvim bolaligimda mebel do‘konga borib, “Bu mebellarni eng yaxshisidan ber, nevaram turmushga chiqqanida ochamiz”, degan ekanlar. Sotuvchi esa 11 yoshli qiz hali qachon turmushga chiqadi deb, ichiga sifatsiz yog‘ochlar, hatto axlat aralashtirib bervorgan, deya eslaydi Shahzoda.
Yillar o‘tib, oilasi bu mebellarni uyga joylashtirmoqchi bo‘lib ochganida ichidan yaroqsiz, sifatsiz yog‘och chiqib, haqiqat yuzaga chiqqan.
Shahzoda Muhammedova yoshlik yillarida o‘zini turmush qurmaydigan ayollar qatorida tasavvur qilganini yashirmaydi.
20 yoshimda men ham turmushga chiqarmikanman deb o‘ylaganman. Kursdoshlarim orasida eng oxirgi bo‘lib, 28 yoshimda turmush qurdim. Chunki men aktrisa edim, faol karyera qilayotgan ayol edim — buni ko‘rgan sovchilar kelishga jur’at etmasdi, deydi u.
Aktrisaning aytishicha, kelgan sovchilar ham birinchi navbatda uning ish faoliyatini to‘xtatish yoki to‘xtatmaslik masalasiga qiziqqan.
Hech kim biz uning ishini, san’atga bo‘lgan mehrini tushunamiz demasdi. Uyimizga kelgan sovchilar doim “turmushga chiqsa ishini to‘xtatadimi?” deb so‘rardi, deydi aktrisa.
Shahzoda hayot yo‘lida oilaviy baxt sabr-toqat va ishonch bilan barpo etilishini o‘z tajribasi orqali ko‘rsatmoqda.
Izoh (0)