Ilgari 40 yoshdan keyin farzand ko‘rish noodatiy hodisa sifatida qabul qilinar edi. Bugun esa bunday xabarlar hech kimni hayratga solmaydi, aksincha, millionlab befarzand insonlarga umid baxsh etadi. Quyida kechroq bo‘lsa ham, ota-onalik maqomiga erishgan mashhurlar haqida ma’lumot beramiz.
Naomi Kempbell: 53 yoshida ikkinchi marta ona bo‘lgan
2023-yil iyunda Naomi Kempbell “Beqiyos ne’mat!” degan yozuv bilan bolakayning qo‘lchasi ko‘ringan postini e’lon qilganida, ushbu yangilik butun dunyoda katta shov-shuvga sabab bo‘ldi. 90-yillarning eng yaxshi supermodeli 53 yoshida ikkinchi bor ona bo‘ldi. Har doim e’tibor markazida bo‘lgan Kempbell 2021-yilda birinchi marta ona bo‘lganida ham bu holatni so‘nggi paytgacha sir saqlagan va shunchaki: “Ona bo‘lish uchun hech qachon kech emas”, degan edi. U vaqtda model 50 yoshda bo‘lgan.
Ijtimoiy tarmoqlarda modelning bolalarni o‘zi dunyoga keltirganmi yoki surrogat onalik yordamida ota-ona bo‘lganmi, degan savollar ko‘p bo‘ldi. Ammo Naomi bu xabarlarga hech qanday izoh bermadi.
Hilari Svonk: 48 yoshida egizak farzandli bo‘lgan
Ikki karra “Oskar” sovrindori Hilari Svonk uozq yillar davomida onalik tuyg‘usini his qilishni orzu qilgan. Nihoyat, 48 yoshida u egizak — o‘g‘il va qiz farzandli bo‘lgan.
Svonk homiladorlikni ommadan yashirmagan, ammo suratga olish maydonchasida uning hamkasblari bu qornining haqiqiy ekaniga ishonmay, uni grim deb o‘ylashgan. Aktrisa intervyularidan birida:
“Hayotda hamma narsa o‘z vaqtida sodir bo‘ladi. Bolalarim aynan kerakli paytda tug‘ildi”, deb aytgan.
Xolli Berri: 47 yoshida o‘g‘il ko‘rgan
Aktrisa Xolli Berri 47 yoshida ikkinchi marta homilador ekanini bilgach, qattiq hayajonlangan:
“Avvaliga juda qo‘rqib ketdim! Bu rost bo‘lishi mumkin emas deb o‘yladim. Keyin esa yana bir onalik tajribasi menga ulkan baxt olib keldi, bu taqdir tuhfasi edi”, degan u intervyularda.
Aktrisaning bir nafar qizi ham bor.
Jorj Kluni: 56 yoshida birinchi marta ota bo‘lgan
Aktyor Jorj Kluni yillar davomida “abadiy bo‘ydoq” sifatida tanilgan. U hatto o‘zi ham farzandli bo‘lish niyati yo‘qligini bildirgan. Shuning uchun 56 yoshida uning va turmush o‘rtog‘i, huquqshunos Amalya Klunining egizak farzandli bo‘lgani haqidagi xabar ommaviy axborot vositalarida katta shov-shuvga sabab bo‘lgan. Uning rafiqasi o‘sha paytda 39 yoshda bo‘lgan.
Jorj keyinroq e’tirof etganidek, bu hodisa uning hayotini tubdan o‘zgartirib yuborgan: “Men endi butunlay boshqa odamga aylandim”, degan aktyor.
Janet Jekson — 50 yoshida ona bo‘lgan
Xonanda va raqqosa Janet Jekson yillar davomida karyerasini birinchi o‘ringa qo‘ygan va buni hech qachon yashirmagan. 50 yoshga kirgan Jekson homiladorligini e’lon qilganda, shou-biznes olami bu yangilikni hayrat va quvonch bilan kutib olgan:
“Bu qaror ruhiy tayyorligimga bog‘liq edi. Hammasi o‘z vaqtida ro‘y berganidan baxtliman”, degan u.
Izoh (0)