Namanganda bir oilaning 3 nafar aʼzosi is gazidan zaharlanib vafot etdi
Namangan viloyatining Pop tumanida bir oilaning 3 nafar aʼzosi is gazidan zaharlanib vafot etdi. Bu haqda Bosh prokuratura matbuot xizmati “Daryo”ga xabar berdi.
Foto: “Daryo” / Madina Nurman
Maʼlum qilinishicha, 18-noyabr kuni soat 7:30 larda Pop tumani, “Iskovut” MFYda yashagan 36 yoshli A.B., farzandlari 10 yoshli O.A. hamda 14 yoshli A.A. yashash xonadonida isitish uchun o‘rnatilgan qo‘lbola usulda tayorlangan pechkaga yoqilgan tabiiy gazdan chiqqan is gazidan zaharlanib vafot etgan.
Shuningdek, xonadonda bo‘lgan A.B.ning turmush o‘rtog‘i G.M. is gazidan zaharlanib, og‘ir holatda tibbiyot birlashmasiga olib kelingan. Ko‘rsatilgan tibbiy yordam natijasida uning hayoti saqlab qolingan.
Mazkur holat yuzasidan Pop tuman prokuraturasi tomonidan tergovga qadar tekshiruv harakatlari olib borilmoqda.
Is gazidan vafot etayotgan fuqarolar
2023-yil oktyabr oyida Samarqand viloyati Oqdaryo tumanidagi xonadonlarning birida uch kishi is gazidan zaharlanib vafot etgandi. Fevral oxirida esa Surxondaryoning Boysun tumanida bir oilaning 5 nafar a’zosi is gazidan vafot etgani to‘g‘risida xabar berilgan edi.
2024-yil mart oyida Farg‘ona viloyati Beshariq tumanida bir oilaning uch a’zosi is gazidan zaharlanib vafot etgan edi. Shuningdek, Toshkent viloyatining Yangiyo‘l tumanida er-xotin is gazidan vafot etdi.
Oktyabr oyida Qoraqalpog‘istonning Nukus shahrida uch kishi is gazidan zaharlanib vafot etgandi. Noyabr oyi avvalida Andijon viloyatining Jalaquduq tumanida 4 kishi is gazidan zaharlanib, vafot etdi.
Favqulodda vaziyatlar vazirligi respublika aholisi hamda tashkilot, korxona va muassasalar rahbarlariga murojaat bilan chiqib, kunlar sovishi natijasida elektr, gaz yoki boshqa yoqilg‘ida ishlaydigan isitish moslamalaridan foydalanishda eʼtiborsizlik tufayli is gazidan zaharlanish, havo-gaz aralashmasining chaqnashi va yong‘inlar sodir bo‘lishi mumkinligini bildirib, bunday holatlarning oldini olish maqsadida tavsiyalar bergandi.
Izoh (0)