“Manchester Yunayted” bosh murabbiyi Ruben Amorim o‘zining klubdagi kelajagi haqida fikr bildirdi. U Sky Sports nashriga bergan intervyusida agar imkon bo‘lsa, mankunianliklar safida 20 yil ishlashni istashini aytib o‘tdi.
Amorimning aytishicha, uning eng katta orzusi – “Manchester Yunayted”da uzoq yillar faoliyat yuritish va klub bilan birgalikda sovrinlar yutishdir.
Eng katta orzum — “Manchester Yunayted”da uzoq vaqt qolish va ular bilan ko‘plab sovrinlarni qo‘lga kiritish. Bu yerda kamida 20 yil ishlashni istayman. Bu mening eng katta maqsadim va unga ishonaman. Albatta, bu biz erishadigan natijalarga bog‘liq bo‘ladi. O‘tgan mavsum menga bo‘lgan ishonch deyarli o‘z chegarasiga yetganini tushunaman. Shunga qaramay, hammasini boshidan boshlashga tayyorman, deydi Amorim.
Portugaliyalik mutaxassis avvalgi jamoasi — “Sporting”dagi faoliyati haqida ham gapirdi:
“Sporting”da menga uch oyda ishdan ketasan, deyishgan edi. Hatto, kubok yutish ehtimolim atigi 3 foiz, deyilgan. Hozir “Yunayted”da ham shunday bosim bor. Lekin men klubni tez-tez o‘zgartirish tarafdori emasman. Odamlar bilan mustahkam munosabatlar o‘rnatishni yoqtiraman. “Manchester Yunayted” meni emas, men ularni tanladim. Bu klub menga mos tushishini his qildim. Imkoniyat bor ekan, bu yerda qolaman.
Ma’lumot uchun, “Manchester Yunayted” o‘tgan mavsum Angliya Premyer Ligasida atigi 42 ochko jamg‘arib, 15-o‘rinda yakunladi. Shuningdek, “qizil iblislar” Yevropa Ligasi finalida “Tottenhem”ga mag‘lub bo‘lib, keyingi mavsum uchun Chempionlar Ligasi yo‘llanmasidan ham mahrum bo‘ldi.
Izoh (0)