Amerikalik qo‘shiqchi Merayya Kerining onasi Patrisiya va opasi Elison o‘tgan dam olish kunida bir kunda vafot etdi. Bu haqda qo‘shiqchi People jurnaliga ma’lum qildi.
All I Want for Christmas Is You xit qo‘shig‘i ijrochisi va “Gremmi” mukofoti sovrindori hozirda “yuragi og‘rigan”, ammo o‘limidan bir hafta oldin onasi bilan birga bo‘lolganidan “baxtli” ekanligini aytdi. Merayya Keri, shuningdek, muxlislari va barcha obunachilariga qo‘llab-quvvatlaganlari uchun minnatdorlik bildirdi.
Xonandaning onasi Patrisiya 87 yoshida, opasi Elison 63 yoshda dunyodan ko‘z yumdi. Xonandaning ma’lum qilishicha, ularning o‘limi sabablari aniq emas.
Patrisiya Keri opera qo‘shiqchisi va vokal o‘qituvchisi edi. BBC taʼkidlaganidek, Merayya memuarida onasi va opasi bilan bo‘lgan murakkab munosabatlari haqida aytib o‘tgan. Kitob 2020-yilda nashr etilgan. Nashr qilinganidan keyin Elison Keri singlisini tuhmat qilganlikda ayblab, kitobning chiqarilishi uning uchun “katta ruhiy zarba” bo‘lganini aytib, sudga murojaat qiladi.
Shunga qaramay, Keri memuarida onasiga bo‘lgan mehri, u bilan yaxshi munosabatda bo‘lgani haqida ham yozgan . 2010-yilda onasi bilan hamkorlikda qo‘shiqchi O Come All Ye Faithful / Hallelujah Chorus duetini yozgan.
Izoh (0)