Surxondaryoning Boysun tumanida bir oilaning 5 nafar a’zosi is gazidan vafot etdi. Bu haqda “Daryo”ga Bosh prokuratura matbuot xizmati rahbari Hayot Shamsutdinov ma’lum qildi.
25-fevral kuni taxminan soat 10:30 larda tumanning “Duoba” mahallasida yashagan erkak J.X. (1980-yilda tug‘ilgan) va uning uch nafar voyaga yetmagan farzandi — bir o‘g‘il (2013-yilda tug‘ilgan) va ikki qizi (2016 va 2018-yillarda tug‘ilgan) yashash uyida uxlab yotgan vaqtida temirdan qo‘lbola yasalgan pechdan chiqqan is gazidan dimiqib, voqea joyida vafot etgan.
Erkakning turmush o‘rtog‘i Z.N. (1986-yilda tug‘ilgan) va voyaga yetmagan yana bir qizi Boysun tuman tibbiyot birlashmasiga qarashli jonlantirish bo‘limiga yotqizilgan. Biroq ko‘rsatilgan tibbiy muolajalarga qaramay, 2008-yilda tug‘ilgan qiz 27-fevral kuni soat 10:45 larda tuman tibbiyot birlashmasida vafot etgan.
Mazkur holat yuzasidan tergovga qadar tekshiruv harakatlari Boysun tuman prokuraturasi tomonidan olib borilmoqda.
