Shunday san’atkorlar borki, ular xonandalikda ham, aktyorlik faoliyatida ham yaxshi natijalarga erishgan. Bunday omad va imkoniyat barchaga berilmagan, lekin muvaffaqiyat o‘z ustida ishlovchilarga kelishi quyidagi aktyor va qo‘shiqchilarda o‘z isbotini topgan.
Jennifer Lopez
Yoshligidan qo‘shiqchilik va aktyorlik sohasida baravar faoliyat olib borgan Jennifer Lopez millionlab muxlislar qalbidan joy olgan. Uning taronalari dunyo top qo‘shiqlari bosqichiga chiqqan, “To‘y tashkilotchisi” komediyasi esa barcha tomoshabinlarga tabassum ulashgan. Biroq, Lopez xonandalik faoliyatini bir necha yil ichida yakunlashi haqida aytib o‘tgandi. Uning yaqinda namoyish etilgan “This is me… Now” albomi so‘nggi asari bo‘lishi mumkin.
Ledi Gaga
Kino, musiqa, tadbirkorlik… Ledi Gaga faoliyati bilan bog‘liq ro‘yxatni yana davom ettirish mumkin. U 2023-yilda “Joker” filmining ikkinchi qismida Xoakin Feniks bilan suratga tushgan. Bundan avval u “The Chromatica Ball” konsertlar turini yakunlagan edi. Qiziq, qo‘shiqchi dam olishga ulgurarmikan?
Ariana Grande
Betakror xonanda Ariananing faoliyati kinodan boshlangan bo‘lsa-da, ko‘pchilik uni xonanda sifatida taniydi. U kino sanoatidagi karyerasini “G‘olib Viktoriya” serialidan boshlagan. 2023-yildan beri xonanda “Wicked” nomli to‘liq metrajli myuzikl ustida qizg‘in ishlar olib bormoqda. Premyera 24-noyabrda bo‘lishi kutilmoqda.
Selena Gomes
Selena Gomes ilk bor “Disney” bolalar telekanalidagi ko‘rsatuvda teleboshlovchi sifatida ish boshlagan. Demi Lovato va Mayli Sayrus bilan birgalikda suratga tushgan seriali unga mashhurlik olib keldi. “Beyverli pleys sehrgarlari” komediyasidagi ijrosi uchun “Kid’s Choice Awards” va “ALMA Award” mukofotlarini qo‘lga kiritdi. 2008-yilda “Zolushkaning yana bir hikoyasi” filmida Selena asosiy rolni ijro etdi.
Gomes o‘z iste’dodini boshqa yo‘nalishlarda ham namoyish etdi. Muxlislar uni dublyaj aktrisasi, qo‘shiqchi, qo‘shiqlar muallifi, bastakor, prodyuser, dizayner va model sifatida ham yaxshi biladi. Mashhur yulduz xayriya ishlariga ham e’tibor qaratadi va UNICEFning ko‘ngilli vakili hamdir.
Djared Leto
Djared Letoning rollari ko‘plab tanqidga uchragan, ammo u muvaffaqiyatli aktyor bo‘lishdan to‘xtamaydi. U “Morbius”, “O‘z joniga qasd qiluvchilar guruhi” va “Gucci uyi” filmlarida o‘ynagan. Musiqa sohasida ham Leto qizg‘in ishlar olib bormoqda. Masalan, u 2023-yil kuzida “Tirty Seconds to Mars” guruhi bilan birgalikda “It’s The End of the World, but It’s Beautiful Day” nomli musiqiy albom chiqardi va u muxlislar tomonidan yuqori baholandi.
Izoh (0)