Muxlislari unga baho berishda lug‘atlaridagi eng qoyilmaqom so‘zlarni ayamaydigan xonanda, O‘zbekistonda xizmat ko‘rsatgan artist, “Bolalar” guruhi solisti Tohir Sodiqov sanʼatni endi boshlagan vaqtlaridayoq Amerikadagi musiqiy albomlar do‘konidagi ro‘yxatga qo‘shiqlari kiritilgan. Qisqa vaqt ichida mashhurlikka erishib, gastrollar safarlarida bir stadionda 2-3 marotaba konsert bergan, bugungi kunda to‘ylardagi “birrovi” narxi 2000 dollar bo‘lgan xonandaning sanʼatga kirib kelishi qanday kechgan?
Tohir Sodiqovning bolaligidayoq dunyodan ko‘z yumgan otasi Bahromjon Sodiqov zahiradagi ofitser va uchuvchi bo‘lgan. Turmush o‘rtog‘ining vafotidan keyin masʼuliyat o‘z yelkasiga tushgach, onasi zavodga ishga kirgan. Bolaligini juda yaxshi eslaydigan xonanda maktabda eng sho‘x o‘quvchilardan biri bo‘lgan bo‘lsa-da, yaxshi o‘qigan.
— Maktabda juda sho‘x edim, lekin 10 yil o‘qib biror marta choragimga uch baho olmaganman. To‘rt baholarim ham bir-ikkita bo‘lardi xolos. Kitob o‘qish jon-u dilim edi. Men o‘zbek sinfda, opalarim esa rus sinfda o‘qishgan. Ammo rus tilini ham juda yaxshi bilardim. Maktabdosh do‘stlarimiz bilan 1989-yili guruh tashkil qilish va qo‘shiq aytish fikri paydo bo‘lgan. Javohir Zokirov pochchasi bilan gaplashib ko‘rishini aytgan. U paytda Nargiz Zokirovaning turmush o‘rtog‘i Ruslan Sharipov edi, — deydi Tohir Sodiqov.
Javohir Zokirov sabab Tohir Sodiqov Ruslan Sharipov bilan tanishgan. U o‘z davrining eng hit qo‘shiqlarini yozadigan bastakori edi. “Bolalar” guruhining ilk tarkibida Bahodir Po‘latov, Husan Sodiqov (Tohir Sodiqovning akasi), Javohir Zokirov, Nargiza Zokirova, Tofik Morduxayev, Toir Odilov va Tohir Sodiqovlar bo‘lgan.
— Hamma biladi, o‘sha yillari Yuriy Shatunov boshchiligida “Laskoviy may” guruhining ijodi gullagan yillar edi. Biz ham barcha yoshlar singari ularga havas qilardik, baʼzida o‘xshashga intilardik. Guruhga nom topish kerak bo‘lganida ham “Jozibador may” deb nomlamoqchi bo‘lganmiz. Bir kuni Ruslan Sharipovning ofisiga borib, shu borada gaplashib qoldik. U o‘zbek qo‘shiqchilari bilan ishlasa ham bu tilni uncha yaxshi bilmasdi. Yoshimiz deyarli teng bo‘lsa ham “Patsani” deb murojaat qilardi. Shunda Bahodir Po‘latov “Bolalar” deb qo‘ysak-chi deb taklif kiritdi. Nom barchaga maʼqul bo‘lganidan keyin shunday nomlashga qaror qildik, — deydi xonanda.
Guruh ilk yakkaxon konsert dasturini 1990-yil 23-fevralda “Alpomish” sport saroyida taqdim etgan. Yanvar oyida esa “Esingdami seni” nomli ilk albomi taqdim etilgan edi. Oradan uch oy vaqt o‘tmasdan muxlislardan konsert berish borasida jiddiy takliflar tushgan va ular “Xalqlar do‘stligi” sanʼat saroyida konsert berishgan.
— O‘sha yillarda konsert tashkilotchilari bo‘lib ishlagan insonlar “Bolalar”ni juda yaxshi eslashadi. Talab yuqori bo‘lgani uchun bitta stadionda ikki-uch marotaba konsert berardik. Jamoamiz katta edi, uning ustiga diskoteka ruhiyatini yaratish uchun chiroqlar va ovoz kuchaytiruvchi uskunalarni ham o‘zimiz bilan olib yurardik. Endi Toshkentga qaytamiz deganimizda yana qaysidir viloyat yoki qo‘shni respublikadan taklif tushardi. Ammo juda qiyin yillar edi. Bir mashina pulingiz bo‘lsa ham do‘konlarda sotib olishga narsa bo‘lmasdi. Gastrollarda ovqatdan ko‘p qiynalardik, — eslaydi Tohir Sodiqov.
Tohir Sodiqovning ilk bor AQSHga borganida ko‘zlariga ishonmagani va musiqiy do‘konda bo‘lgan voqealar haqida so‘zlab berdi.
Birinchi marta AQShga borganim paytlarimda kassetalar yo‘qolib, disklar paydo bo‘layotgan yillar edi. “Bolalar” guruhi O‘zbekistondan birinchilardan bo‘lib albomini disk ko‘rinishida chiqargan. Yashirmayman, o‘shanda AQSHdagi baland binolarni ko‘rib og‘zim ochilib qolgandi. Musiqiy albomlar do‘koniga borganmiz. Mamlakat harfini tanlasangiz, u yerdagi mashhur qo‘shiqchilarning nomi chiqar ekan. O‘zbekistonlik qo‘shiqchilardan Turg‘un Alimatov, Munojat Yo‘lchiyeva va “Yalla” guruhining albomlari sotilar ekan. Sotuvchiga 10 ta yangi albomimni qoldirib, kartatekaga kiritib qo‘yishini so‘ragandim, — deydi Tohir Sodiqov.
Qo‘shiqchi uylagan va ilk bor ota bo‘lgan kunini hayotidagi eng baxtli kunlaridan deb ataydi. Xo‘sh, ayoli Shahnoza bilan muhabbat tarixi qanday bo‘lgan?
— Bir kuni Toshkentdagi Qorasuv dahasi tomondan qaytayotgandik. Yomg‘ir yog‘ib turibdi, bir qiz yo‘lda ketayotgan ekan. Unga rahmim kelib to‘xtasam, “Kerakmas, ketavering” deb noz qilgan. Ertasi kuni ham uni yo‘lda ko‘rganman. Xullas, ko‘nglim tushib, uy telefonini so‘raganman. Ammo meni haligacha qiziqtiradigani Shahnoza u dahada yashamagan, o‘qimagan bo‘lsa (kulib). Men bilan uchrashish uchun atayin yo‘limdan chiqqanmikan?
Ayolim bilan to‘rt yil davomida bir-birimizni sinaganmiz. Onamga sovchilikka boring desam, “Avval ishni pishit, borsam uydagilari yo‘q desa-chi”, degan. Chunki onam juda g‘ururli inson bo‘lgan. Xullas, bir-birimizni sinaganimizdan keyin oila qurishni taklif qilganman. Ikki qiz va bir o‘g‘il farzandni tarbiyaladik. Shahnozaning asl kasbi shifokorlik, ammo farzandlarimiz sabab ishlamadi, ularning tarbiyasi bilan shug‘ullandi, — deydi Tohir Sodiqov.
Tohir Sodiqov o‘zbek estradasida duetdosh tanlash borasidagi eng injiq xonanda hisoblanadi. Hatto, u Cover Up loyihasida g‘olib bo‘lgan yosh ijodkor bilan duet kuylashni ham rad etgan. Buning sababini quyidagicha izohlaydi.
— Yuristim va menejerim bor. Men avvaldan duetlarni shunchaki ijro etgan odam emasman. Taklif u xonanda tomonidan kiritilayotgan bo‘lsa, albatta, haq so‘rayman. Men bilan duet aytish uchun 25-30 ming AQSH dollari miqdorida gonorar to‘lashi kerak. Ko‘rsatuvga borganimda kutilmaganda duet aytasiz deb qolishgan. 34 yillik sanʼatkor yosh ijrochi bilan duet kuylashi qanchalik to‘g‘ri? Dadasi yoki kanal maʼmuriyati pul bersa boshqa gap edi, — deydi xonanda.
Izoh (0)