Braziliya Oliy sudi mamlakatning sobiq prezidenti Jair Bolsonaroni uy qamog‘iga olish to‘g‘risida qaror chiqardi. U hokimiyatni noqonuniy yo‘l bilan egallash rejasini tuzganlikda ayblanmoqda, ammo sobiq prezident bu da’voni rad etmoqda. Bu haqda BBC xabar berdi.
Sudya Aleksandre de Moraysga ko‘ra, bu qaror Bolsonaro iyul oyida unga nisbatan belgilangan cheklovlarga amal qilmagani sababli qabul qilingan. Sobiq prezidentning yuristlari bu cheklovlar buzilmaganini ta’kidlab, Oliy sud qaroriga qarshi shikoyat qilmoqchi ekanini bildirgan. Ular sud qarorining asossizligini aytmoqda.
AQSH Davlat departamenti sobiq prezidentning uy qamog‘iga hukm qilingani yuzasidan bayonot berib, bu qarorni qoralagan va ushbu “noqonuniy harakatlarga ko‘maklashayotganlar javobgarlikka tortilishini” ma’lum qilgan.
AQSH prezidenti Donald Tramp esa Bolsonaroga nisbatan olib borilayotgan sud jarayonini “jodugarlik ovi” deb atamoqda. Prezident ushbu ishni sabab qilib ko‘rsatgan holda, Braziliyadan import qilinadigan ayrim mahsulotlarga 50 foizlik boj joriy etishini e’lon qilgan — garchi AQSH va Braziliya o‘rtasida savdo balansi mavjud bo‘lsa-da.
Sudya de Moraysning aytishicha, Bolsonaro o‘zining siyosiy ittifoqchilari, xususan, o‘g‘illari orqali ijtimoiy tarmoqlarda Braziliya sud tizimiga chetdan aralashuvga va uni qoralashga undovchi postlarni tarqatgan.
Braziliyaning bir qancha shaharlarida 3-avgust kuni Bolsonaro tarafdorlari norozilik namoyishlarini o‘tkazgan. Uning o‘g‘li, senator Flavio Bolsonaro Rio-de-Janeyrodagi mitingda otasinining fikrlarini telefon orqali ommaga yetkazgan. Keyinroq u bu videoni ijtimoiy tarmoqqa joylashtirgan, ammo keyin uni o‘chirib yuborgan. Sudya aynan shu holatni asos qilib, Bolsonaroning ilgari belgilangan cheklovlarga atayin rioya qilmaganini ta’kidlamoqda.
“Ogohlantirish choralarini qo‘pol ravishda mensimaslik shu qadar aniq ediki, ayblanuvchining o‘g‘li, senator Flavio Nantes Bolsonaru qonunbuzarlikni yashirish uchun Instagramdagi sahifasidan postni o‘chirib tashlashga qaror qildi”, deyiladi sud qarorida.
Sud, shuningdek, sobiq prezidentga odamlar bilan uchrashishni (faqat yuristlar yoki sud tomonidan ruxsat etilgan shaxslar bundan mustasno) va telefon ishlatishni taqiqlagan.
“Adolat ko‘r, lekin ahmoq emas. Sudlanuvchi siyosiy va iqtisodiy qudratga ega degani uning sudni ahmoq qilishiga yo‘l qo‘yiladi degani emas” deb qo‘shimcha qilgan sudya.
Qayd etilishicha, ushbu cheklovlar Bolsonaro AQSH prezidentini Braziliyadagi ichki ishlarga aralashishga undayotgani ortidan joriy etilmoqda.
Ma’lumot uchun, Tramp Bolsonaro bilan uning prezidentlik davrida yaqin munosabatda bo‘lgan, jumladan ular 2019-yilda Oq uyda uchrashgan. Iyul oyida Tramp ijtimoiy tarmoqlarda Bolsonaro tarafini olgan holda uning aybsizligini aytgandi. Shuningdek, Jair Bolsonaroni Tramp “mamlakatini chin dildan sevuvchi kuchli lider” sifatida maqtagan.
Izoh (0)