Farg‘ona viloyati Beshariq tumanida bir oilaning uch a’zosi is gazidan zaharlanib vafot etdi. Bu haqda Bosh prokuratura matbuot kotibi Hayot Shamsutdinov “Daryo”ga ma’lum qildi.
Qayd etilishicha, 1-mart kuni Besharik tumani Obodon ko‘chasida yashagan 1973-yilda tug‘ilgan erkak va uning ikki nafar (12 yoshli qizi va 11 yoshli o‘g‘li) farzandi yashash xonadonida is gazidan zaharlanib vafot etgan.
“Ko‘zdan kechirish davomida marhumlar istiqomat qilgan xonadonda nostandart qo‘lbola isitish pechidan foydalanilgani aniqlangan”, — deyiladi xabarda.
Hozirda marhumlarning o‘limi bo‘yicha sud-tibbiyot ekspertizasi tayinlangan.
Eslatib o‘tamiz, 2023-yil oktyabr oyida Samarqand viloyati Oqdaryo tumanidagi xonadonlarning birida uch kishi is gazidan zaharlanib vafot etgandi. Fevral oxirida esa Surxondaryoning Boysun tumanida bir oilaning 5 nafar a’zosi is gazidan vafot etgani to‘g‘risida xabar berilgan edi.
Izoh (0)