Yaponiyada anime studiyaga o‘t qo‘yib, 36 kishining hayotiga zomin bo‘lgan shaxs o‘limga hukm qilindi

Kioto sudi 45 yoshli Shinji Aobeni 2019-yilda Kyoto Animation studiyasi binosiga o‘t qo‘yganlikda aybdor deb topdi. Yong‘in oqibatida 36 kishi halok bo‘lgandi. Aoba o‘lim jazosiga hukm qilindi.

ABC News xabariga ko‘ra, sudya hukm uchun Aobaning aqli yetarlicha raso ekanini ta’kidlagan. U o‘t qo‘yishni ataylab rejalashtirgan va nima qilayotganini tushungan holda jinoyat sodir etgan. Ayblanuvchi 25-yanvar kuni bo‘lib o‘tgan ikki sud majlisidan so‘ng o‘limga hukm qilindi.

“Studiyani bir zumda do‘zaxga aylantirgan va 36 kishining qimmatli hayotiga zomin bo‘lgan hujum cheksiz azob-uqubatlarga sabab bo‘ldi”, — dedi sudya Keysuke Masuda.

Shinji Aoba 2019-yil 18-iyul kuni Kyoto Animation anime studiyasiga kirgan. U hamma narsaga benzin sepib, o‘t qo‘ygan va studiya ishchilari o‘lishi kerak deb baqirgan. Ruhiy kasal erkak Kyoto Animation xodimlari go‘yoki uning g‘oyasini o‘g‘irlashganiga ishongan. Yong‘in oqibatida 36 kishi kuyish yoki is gazidan zaharlanish oqibatida halok bo‘ldi, studiyaning 70 nafar xodimidan 32 nafari og‘ir tan jarohati oldi. Ularning ko‘pchiligi nogiron bo‘lib qoldi.

Sudya Keysuke Masudaning so‘zlariga ko‘ra, Aoba yozuvchi bo‘lishni xohlagan va moliyaviy muammolarga duch kelgan. Kyoto Animation ijodiy tanlovini o‘tkazganida, u o‘z asarlaridan birini studiyaga yuborgan. Keyinchalik, erkak studiya uning nashr etilmagan kitobidagi g‘oyalardan anime seriyasini yaratishda foydalanganini aytib, qasos olishga qaror qilgan. Animatsiya studiyasiga o‘t qo‘yishdan bir oy oldin Aoba Tokio yaqinidagi temiryo‘l vokzalida ham terakt uyushtirishni rejalashtirgan, biroq buni amalga oshirmagan.

Aobaning o‘zi ham qattiq kuygan — u 12 marta operatsiya qilingan va o‘n oy kasalxonada yotgan. Erkak uzoq vaqt davomida ovqatlanish va mustaqil turish qobiliyatini yo‘qotgan. Aoba sog‘lig‘i nisbatan tiklanganidan keyingina hibsga olindi va sudga tortildi. U sudda nogironlar aravachasida o‘tirgan holda ishtirok etdi.

Prokuratura ayblanuvchini osib o‘ldirishni talab qildi. Aobaning advokatlari o‘z mijozining ruhiy holatini ko‘rsatib, jinoyat vaqtida uning aqli raso bo‘lmaganini ta’kidladi va yengilroq jazo tayinlashni so‘radi.

Avvalroq sud jarayonida Shinji Aoba to‘rt yil ichida ilk bor qurbonlarning yaqinlaridan kechirim so‘ragan.