Prezident 2-dekabr kuni “Qishloq xo‘jaligi sohasida davlat boshqaruvini yanada takomillashtirish chora-tadbirlari to‘g‘risida”gi qarorni imzoladi.
Hujjatda qayd etilishicha, hududlar agrosanoat tarmog‘idagi davlat boshqaruvi organlari vazifa va funksiyalarining takrorlanishi, hududlarda yagona boshqaruv tizimining mavjud emasligi samarali hamkorlikni yo‘lga qo‘yishga, sohada yagona davlat siyosatini olib borish va strategik vazifa va islohotlarni yetarlicha amalga oshirishga to‘sqinlik qilmoqda.
Mazkur holat hududlarda qishloq xo‘jaligi sohasida yagona integratsiyalashgan davlat boshqaruvi tizimini yo‘lga qo‘yish zaruratini keltirib chiqarmoqda.
Qaror bilan Qoraqallog‘iston Respublikasi Vazirlar Kengashi va viloyatlar hokimliklari tuzilmalariga qishloq xo‘jaligi vaziri taqdimnomasiga binoan lavozimga tayinlanadigan Qoraqalpog‘iston Respublikasi Vazirlar kengashi raisining va viloyatlar hokimlarining qishloq va suv xo‘jaligi masalalari bo‘yicha o‘rinbosari — Qoraqalpog‘iston Respublikasi qishloq xo‘jaligi vaziri, viloyat qishloq xo‘jaligi boshqarmasi boshlig‘i lavozimi kiritilmoqda.
Shuningdek, tuman (Quvasoy shahar) hokimliklari tuzilmalariga hokimning qishloq va suv xo‘jaligi masalalari bo‘yicha o‘rinbosari — tuman (Quvasoy shahar) qishloq xo‘jaligi bo‘limi boshlig‘i lavozimi kiritilmoqda.
Ushbu lavozimlarga tayinlanayotgan shaxslar quyidagilarga alohida e’tibor qaratadi:
- oziq-ovqat xavfsizligini ta’minlash, oziq-ovqat va qishloq xo‘jaligi sohalarini modernizatsiyalash, diversifikatsiya qilish va barqaror o‘sishini qo‘llab-quvvatlash uchun xususiy investitsiya kapitali oqimini ko‘paytirish orqali sohada davlat ishtirokini kamaytirish va investitsiyaviy jozibadorlikni oshirish mexanizmlarini joriy qilish;
- respublika aholisining suvga bo‘lgan ehtiyojlarini qondirish uchun shart-sharoitlar yaratish, suv resurslarini tejash va undan samarali foydalanishni ta’minlash choralarini ko‘rish;
- qishloq hududlarini rivojlantirish dasturlarini amalga oshirishni ta’minlash;
- qishloq xo‘jaligi sohasida raqamli (smart) texnologiyalarni keng joriy etish, yangi ish o‘rinlari va xizmatlarni tashkil qilish chorasini ko‘rish.
Qishloq xo‘jaligi vazirligining hududiy tarkibiy bo‘linmalarida oziq-ovqat xavfsizligini ta’minlashga mas’ul xodim lavozimi joriy etilmoqda.
Prezident 20-noyabr kuni Oliy Majlis Qonunchilik palatasining majlisida aholi soni ko‘payib borayotgan hozirgi sharoitda oziq-ovqat xavfsizligini ta’minlash eng dolzarb vazifa bo‘lib qolishini ta’kidlagandi.
Qishloq xo‘jaligi vazirligi ikki oy muddatda vazirlikning oziq-ovqat mahsulotlarini yetishtirish va oziq-ovqat xavfsizligini ta’minlash borasidagi vakolatlariga oid normativ-huquqiy hujjat loyihasini tayyorlashi lozim. Oziq-ovqat xavfsizligini ta’minlash borasidagi taqdimnomalarni bajarmaganlik uchun javobgarlikni belgilash yuzasidan Ma’muriy javobgarlik to‘g‘risidagi kodeksga tegishli o‘zgartirish va qo‘shimchalar kiritish bo‘yicha qonun loyihasini ham tayyorlab, Vazirlar Mahkamasiga kiritadi.
Hujjat 2024-yil 3-dekabrdan kuchga kirdi
Izoh (0)