Prezident Shavkat Mirziyoyev 31-oktyabr kuni “Navoiy davlat universitetini tashkil etish chora-tadbirlari to‘g‘risida”gi qarorni imzoladi.
Qarorga bilan Oliy ta’lim, fan va innovatsiyalar vazirligi hamda Navoiy viloyati hokimligining Navoiy davlat pedagogika instituti negizida Navoiy davlat universitetini tashkil etish to‘g‘risidagi taklifi ma’qullangan.
Hududda soha va tarmoqlarning rivojlanish istiqbollarini hisobga olgan holda zamonaviy bilim va malakaga ega bo‘lgan ilmiy va ilmiy-pedagogik kadrlarni tayyorlash, qayta tayyorlash va ularning malakasini oshirish bo‘yicha uzluksiz ta’lim tizimini yaratish universitetning asosiy vazifalari va faoliyat yo‘nalishlaridan biri etib belgilandi.
Navoiy davlat pedagogika institutida tahsil olayotgan barcha talabalar o‘qishlarini universitetda davom ettiradi hamda 2024/2025-o‘quv yilidan bitiruvchi kurs talabalariga universitet diplomi beriladi.
Universitetda 2025/2026-o‘quv yilidan boshlab ehtiyoj yuqori bo‘lgan aniq va tabiiy fanlar, axborot texnologiyalari, sun’iy intellekt, iqtisodiyot, biznes va turizm, investitsiyalarni boshqarish, qishloq xo‘jaligi, ekologiya va atrof-muhit muhofazasi, logistika kabi yo‘nalishlar bo‘yicha kadrlar tayyorlash yo‘lga qo‘yiladi. Shuningdek, dars mashg‘ulotlarini amaliyot bilan birga tashkil etish maqsadida tegishli yo‘nalishlar bo‘yicha ta’lim jarayoni dual ta’lim shaklida yo‘lga qo‘yilib, korxona va tashkilotlarda kafedra filiallari tashkil etiladi hamda ta’lim jarayoniga uzoq yillik mehnat tajribasiga ega amaliyotchi mutaxassislar jalb etiladi.
Yangi tashkil etilgan ta’lim yo‘nalishlari va mutaxassisliklar bo‘yicha xorijiy davlatlar va respublikadagi yetakchi oliy ta’lim tashkilotlari bilan ikkita diplom berishga asoslangan qo‘shma ta’lim dasturlari yo‘lga qo‘yiladi.
Qarorga asosan universitetda faoliyatini takomillashtirish va ta’lim sifatini ta’minlash maqsadida xorijiy mutaxassislarni jalb qilgan holda Transformatsiya markazi tashkil etiladi. Markaz universitet ta’lim dasturlarini xalqaro ta’lim standartlariga moslashtirish, universitetni dunyoning nufuzli universitetlari reytingiga kiritish ustida ish olib borish, universitet dasturlarini xalqaro akkreditatsiyadan o‘tkazish, universitet diplomlarining xorijda tan olinishiga erishish va boshqa masalalarga mas’ul bo‘ladi.
Shuningdek, qarorga muvofiq universitetning ta’lim, tadqiqot va axborot-kutubxona faoliyatlarini hamda boshqaruv jarayonlarini to‘liq raqamlashtirish, 2025-yil 1-iyungacha talabalarning bitiruv malakaviy ishlari va magistrlik dissertatsiyalarini ko‘chirmachilikka qarshi tekshirish (antiplagiat) mexanizmini joriy etish belgilangan.
Avvalroq Termiz muhandislik-texnologiya instituti hamda Termiz agrotexnologiyalar va innovatsion rivojlanish institutini qo‘shib yuborish orqali ularning negizida Termiz davlat muhandislik va agrotexnologiyalar universiteti tashkil etiladi to‘g‘risida xabar berilgandi.
Izoh (0)