Qozog‘iston Markaziy Osiyo davlatlaridan Sirdaryo bo‘ylab 11 milliard kub metr suv olishi mumkin.
Mazkur reja 2025-yilning apreliga qadar Markaziy Osiyo davlatlari bilan kelishuvlar asosida amalga oshirilishi rejalashtirilgan. Bu haqda Ashxobodda bo‘lib o‘tgan Davlatlararo muvofiqlashtiruvchi suv komissiyasi (DMSK) yig‘ilishi yakunlari bo‘yicha Qozog‘iston Suv xo‘jaligi va irrigatsiya vazirligi matbuot xizmati xabar berdi.
Yig‘ilishda Tojikiston, Turkmaniston va O‘zbekiston suv xo‘jaligi idoralari rahbarlari ishtirok etdi. Qirg‘iziston tomoni kuzatuvchi sifatida qatnashgan.
Umumiy hisobda, Markaziy Osiyo davlatlaridan Qozog‘istonga 2025-yil apreliga qadar qishloq xo‘jaligi ekinlarini sug‘orish uchun 11 milliard kub metr suv yetkazib berish kutilmoqda.
Bundan tashqari, yig‘ilish ishtirokchilari Sirdaryo va Amudaryo havzalaridagi suv omborlari ish rejimlarining prognoz jadvallarini, shuningdek, Markaziy Osiyo mamlakatlari uchun 2024—2025-yillar kuz-qish mavsumi uchun suv ta’minoti limitlarini tasdiqlagan.
Qozog‘iston suv xo‘jaligi va irrigatsiya vaziri Nurjan Nurjigitov muzokaralar va birgalikdagi harakatlar tufayli Sirdaryo havzasida suvning samarali taqsimlanishi ta’minlanganini qayd etgan.
Shuningdek, uchrashuv yakunlari bo‘yicha vazirlik maʼlumotlariga ko‘ra, Qirg‘iziston bilan suv-energetika sohasida hamkorlik bo‘yicha kelishuvlar amalga oshirilib, joriy yilning sug‘orish davrida “Bahri—Tojik” suv omboridan foydalanishni muvofiqlashtirish choralari ko‘rilgan.
Qozog‘iston suv taqchil davlat hisoblanib, mamlakat hududining 2,8 foizi suv bilan qoplangan, uchdan ikki qismi qurg‘oqchil zonalardan iborat. Suv resurslarining salmoqli qismi qo‘shni davlatlardan keladi.
2023-yil yakuniga ko‘ra, aholini suv bilan taʼminlash shaharlarda 98,9 foizni, qishloqlarda esa 96,6 foizni tashkil etgan. Mamlakatning faqat to‘qqizta viloyati 100 foiz suv bilan ta’minlangan.
O‘rta Osiyodagi eng yirik daryo hisoblangan Sirdaryo to‘rt davlat: Qirg‘iziston, Tojikiston, O‘zbekiston va Qozog‘iston hududidan o‘tib, Orol dengiziga quyiladi.
Izoh (0)