Ijtimoiy tarmoqlarda issiqxonalarga tabiiy gaz yetkazib berish bo‘yicha cheklovlar o‘rnatilgani haqidagi xabarlar tarqaldi. Energetika vazirligi O‘zbekistonda issiqxonalarga tabiiy gaz yetkazib berish bo‘yicha hech qanday cheklovlar yo‘qligini ma’lum qildi.
Qayd etilishicha, “Issiqxona xo‘jaliklarini rag‘batlantirish bo‘yicha qo‘shimcha chora-tadbirlar to‘g‘risida”gi 2024-yil 26-sentyabrdagi prezident qaroriga muvofiq, issiqxonalar tabiiy gaz uchun to‘lovlarni amalga oshirgan holda foydalanishlari mumkin bo‘lib, ularga tabiiy gaz yetkazib berish bo‘yicha hech qanday cheklovlar mavjud emas.
Ya’ni, issiqxona egalari belgilangan to‘lovlarni amalga oshirib, tabiiy gazdan foydalanishlari mumkin.
Issiqxona xo‘jaliklariga hosil yilining dastlabki 3 oyida (oktyabr, noyabr va dekabr) yetkazib beriladigan tabiiy gaz uchun oldindan to‘lov 50 foiz miqdorida, qolgan qismi oy yakuniga qadar, keyingi oylardan boshlab esa har oyda 100 foiz oldindan to‘lov amalga oshiriladi.
Issiqxonalarni gaz bilan ta’minlash
Prezident 2023-yilning avgustida Buxoroda bo‘lib o‘tgan videoselektor yig‘ilishida Energetika vazirligi viloyat hokimlari bilan birga yoqilg‘i mahsulotlarini (ko‘mir va gaz) issiqxonalarga uzluksiz yetkazib berish kafolatini berishini, issiqxonalar esa yetkazib berilgan yoqilg‘i uchun to‘liq hisob-kitob qilish, qishloq xo‘jaligi mahsulotlarini yetishtirish, ularni ichki bozorga va eksportga chiqarish bo‘yicha majburiyat olishini aytgandi.
Ixtiyoriy ravishda ko‘mir yoqilg‘isida ishlaydigan issiqxonalarga davlat tomonidan rag‘batlantirish paketi joriy qilinishi e’lon qilindi.
Davlat rahbarining 2024-yil 26-sentyabrdagi qarorida Energetika vazirligi va hokimliklar 2024—2025-yil kuz-qish mavsumida Issiqxona xo‘jaliklariga yuqori kaloriyali import ko‘mirni markazlashgan holda to‘g‘ridan-to‘g‘ri shartnomalar asosida yetkazib berilishini ta’minlashi lozimligi belgilangandi.
“Toshkent shahri va uning atrofidagi issiqxonalar va sanoat korxonalari tomonidan atmosferaga chiqarilayotgan tutun va zaharli gazlarni keskin kamaytirish chora-tadbirlari to‘g‘risida”gi prezident farmoni loyihasida 2024-yil 1-oktyabrdan boshlab tabiiy gazdan yoqilg‘i sifatida foydalanuvchi issiqxona xo‘jaliklari va sanoat korxonalarining ekologiya ekspertiza xulosasi mavjud bo‘lmagan taqdirda ularga tabiiy gaz yetkazib berilishiga yo‘l qo‘yilmasligi ko‘zda tutilgandi.
Izoh (0)