Qozog‘iston Rossiyaning donini O‘zbekiston va Xitoyga reeksport qilishni chekladi. Bu haqda Qozog‘iston bosh vaziri Oljaz Bektenov ma’lum qildi.
Ushbu chora 2024-yil oxirigacha Yevrosiyo iqtisodiy ittifoqi (YOII) davlatlaridan bug‘doy importini taqiqlash doirasida amalga oshirilmoqda. Bektenovga ko‘ra, hukumatlararo komissiya yig‘ilishida “Rosselxoznadzor” tomonidan Qozog‘iston qishloq xo‘jaligi mahsulotlarini asossiz bir tomonlama qaytarish holatlari muhokama qilingan. Natijada komissiya vakolatli organlarga cheklovlarni imkon qadar tezroq bekor qilishni tavsiya etgan.
Ilgari Qozog‘iston ichki bozorni himoya qilish maqsadida YOII mamlakatlaridan bug‘doy importini 2024-yil oxirigacha taqiqlagandi. Bektenov bu taqiq Rossiya donining O‘zbekiston va Xitoyga reeksportini cheklashga sabab bo‘lganini aytgan.
Hukumat rahbari, shuningdek, Qozog‘iston 2024-yilda YOII mamlakatlari uchun o‘z hududi orqali yuklarni tranzit tashish bo‘yicha yagona tariflar darajasini oshirganini ma’lum qildi. Xususan, Rossiyadan Qirg‘izistonga donni Qozog‘iston hududi orqali tashish tarifi ikki barobarga ko‘tarildi.
Izoh (0)