“Daryo”da “Prokurorning aytganini qilmagani uchun shu tarzda jazolanyapti. Qamashi prokurori tadbirkorga adolatsizlik qilayotgani rostmi?” sarlavhali maqola e’lon qilingandi. Unda Bosh prokuratura huzuridagi Iqtisodiy jinoyatlarga qarshi kurashish departamenti jamoatchilikka e’lon qilgan axborotlarining birida Qamashi tumanidagi “P.S.” fermer xo‘jaligi rahbari S.P. xo‘jalikning elektr suv nasoslarini tijorat maqsadida tarmoqqa o‘zboshimchalik bilan ulab, katta miqdordagi elektr energiyasidan noqonuniy foydalangani, ammo fermerning akasi asl vaziyat boshqaligini aytgani qayd etilgandi. Qashqadaryo prokuraturasi mazkur maqolaga munosabat bildirdi.
“Qamashi tumani elektr tarmoqlari korxonasi tomonidan o‘tkazilgan reyd tadbirlarida MCHJ rahbari S.P. jamiyatga qarashli yer maydonida joylashgan artezian quduqda mavjud bo‘lgan ikki dona quvvati 4,4 kVt/s bo‘lgan nasoslarni elektr energiyasidan foydalanish bo‘yicha shartnoma tuzmasdan noqonuniy ulab foydalanayotgani aniqlangan. Bu haqda tegishli tartibda dalolatnoma rasmiylashtirilib, H.Sulaymonova nomidagi Respublika sud ekspertizasi markazi viloyat bo‘limining xulosasiga ko‘ra, jamiyat tomonidan tuman elektr tarmoqlari korxonasiga 170 million so‘m miqdorda zarar yetkazilgani ma’lum bo‘lgan.
Ushbu holat bo‘yicha qo‘zg‘atilgan jinoyat ishi doirasida yetkazilgan zarar qoplanmagani sababli jamiyat rahbari S.P.ga nisbatan “qamoqqa olish” ehtiyot chorasi qo‘llanilgan. Ish hujjatlariga ko‘ra joriy yil 8-sentyabr kuni mas’ullar fermer foydalanib kelayotgan artezian quduqlardagi suv nasoslarini ko‘zdan kechirish uchun borganida S.P. va oila a’zolari nasos quduqdan chiqarilib tekshirilsa nosoz holatga kelib qolishini aytgan va bunga qarshilik qilgan. Shu sababli nasoslarni quduqdan chiqarib ko‘zdan kechirish imkoni bo‘lmagan va bu haqda bayonnoma tuzilgan.
So‘ngra soha mutaxassislaridan iborat ishchi guruh tomonidan joriy yil 18-oktyabr kuni jamiyatga qarashli yer maydonida joylashgan artezian quduqlardagi suv nasoslar ochib ko‘rilganida, ularning quvvati 1,1 kVt/s dan jami 2 ta nasosning umumiy quvvati 2,2 kVt/s ekani aniqlangan hamda mutaxassislar jamiyat tomonidan tuman elektr tarmoqlari korxonasiga keltirilgan zarar 90 million so‘m ekanini ma’lum qilgan. Biroq mazkur jamiyatga qarashli 31,9 gektar yer maydonining 2,7 gektar qismida 2024-yilda qishloq xo‘jalik ekinlari ekilgani viloyat nasos stansiyalari va energetika boshqarmasining ma’lumotnomasida esa quvvati 1,1 kVt/s bo‘lgan suv nasosi o‘rtacha 5,6 sotix yer maydonini sug‘orish uchun yetishi ko‘rsatilgan.
Qayd qilingan artezian quduqlardagi suv nasoslarining umumiy quvvati 2,2 kVt/s bo‘lgani haqidagi vajlar va bu asosda to‘plangan dalillar mutaxassislarning xulosalari hamda dastlab ayblanuvchi tomonidan nasoslarni ko‘zdan kechirishga qarshilik ko‘rsatilgani sababli ishning haqiqiy holatlariga nomuvofiq va asossiz deb topilib, tergov organining 30-oktyabrdagi qarori bilan rad qilingan. “P.S.A.” MCHJ 2022-yilda tashkil etilgan bo‘lib muqaddam “S.I.” fermer xo‘jaligiga qarashli bo‘lgan 31,9 gektar yer maydonlari tuman hokimligi bilan 2023-yilda tuzilgan shartnomaga asosan uzoq muddatli ijaraga olingan. Mutaxassislar tomonidan hisoblangan zarar jamiyat tashkil etilgan kundan hisoblangan. Jinoyat ishi yuzasidan dastlabki tergov harakatlari joriy yil 11-noyabr kuni yakunlanib mazmunan ko‘rib chiqish uchun sudga yuborilgan. Endilikda jinoyat ishi sudda ko‘rib chiqilib, sud tomonidan qonuniy baho beriladi”, deyiladi viloyat prokuraturasi mas’ullari bergan axborotda.
Izoh (0)