Madridning “Real” klubi bosh murabbiyi Xabi Alonso Klublar o‘rtasidagi Jahon chempionati yarim finalida “Pari Sen-Jermen”dan qabul qilingan yirik mag‘lubiyat (0:4) yuzasidan fikr bildirdi.
Mutaxassisning ta’kidlashicha, bu o‘yin jamoa uchun muhim saboq bo‘lgan:
“PSJ” — yillar davomida shakllangan, kuchli va tajribali jamoa. Ochig‘i, biz bu darajadagi o‘yinlar uchun hali tayyor emas edik. Bugun o‘z o‘yinimizni topa olmadik. Ayniqsa, tanaffusga qadar uchinchi golni o‘tkazib yuborganimiz juda alamli bo‘ldi. “PSJ” juda yaxshi sport formada, ular yuqori saviyada harakat qilishdi. Oldin boshqa jamoalar qanday qilib qiynalgan bo‘lsa, bu safar biz ham shunday holatga tushib qoldik.
Lekin bu o‘yindan xulosa chiqaramiz. Hali oldimizda katta yo‘l bor. O‘yinimizdagi ko‘plab narsalarni yaxshilashimiz kerak. O‘zimizga tanqidiy qarashni o‘rganamiz va bu mag‘lubiyat bizga o‘sish imkonini beradi, — deya Alonso so‘zlarini keltiradi Marca.
Shuningdek, bosh murabbiy turnir davomida braziliyalik vinger Rodrigo Goesning kam o‘yin amaliyoti olgani borasida ham izoh berdi:
Rodrigoni maydonga tushirmaslik sof taktik qaror edi. Bu uning kelajagiga aloqador emas. Shunchaki, boshqa futbolchilar bilan g‘alaba qozonish imkonimiz yuqoriroq deb hisobladik, — dedi Alonso.
Ma’lumot uchun, Rodrigo musobaqa davomida atigi 92 daqiqa maydonda harakat qildi. U faqat guruh bosqichining birinchi turida “Al-Hilol”ga qarshi (1:1) bahsda asosiy tarkibda o‘ynagan. Pley-offda esa “Borussiya Dortmund”ga (3:2) qarshi uchrashuvda bor-yo‘g‘i 4 daqiqa maydonda bo‘ldi. Turnir davomida braziliyalik futbolchining hisobida bitta golli uzatma bor.
Avvalroq Rodrigoga “Bavariya”, “Arsenal”, “An-Nasr” va “PSJ” klublari tomonidan qiziqish bildirayotgani haqida xabarlar tarqalgan edi.
Eslatib o‘tamiz, Klublar o‘rtasidagi Jahon chempionati finalida “PSJ” va Londonning “Chelsi” jamoalari o‘zaro bahs olib boradi. Hal qiluvchi o‘yin 13-iyuldan 14-iyulga o‘tar kechasi bo‘lib o‘tadi.
Izoh (0)