Xorvatiyalik futbolchi Luka Modrich mavsum yakunlangach, “Real”ni tark etadi. Shu bois madridliklar unga o‘rinbosar qidirmoqda. Bu haqda Cadena Ser nashri xabar berdi.
Unga ko‘ra, klub rahbariyati “Chelsi” yarim himoyachisi Enso Fernandesh va “Bayer” futbolchisi Eksekiel Palasios Luka uchun munosib o‘rinbosar bo‘ladi deb hisoblamoqda. “Real” bosh murabbiyligiga tayinlanishi kutilayotgan Xabi Alonso bu borada muhim rol o‘ynashi mumkin. Ayniqsa, u Leverkuzen klubida Palasios bilan birga ishlagan va uni qanday holatda ekanligini yaxshi biladi.
Shuningdek, “Real” rahbariyati Fernandeshni qo‘lga kiritish imkoniyatini ham o‘rganib chiqmoqda. Agar “Chelsi” Konferensiyalar Ligasi finalida “Betis”ga yutqazsa hamda Chempionlar ligasiga yo‘llanma ololmasa, Enso londonliklar safini tark etishi ehtimoli oshishi kutilmoqda. Bu omillar futbolchining kelajagini hal qilishda muhim rol o‘ynashi mumkin. Avvalroq Fernandesh “Chelsi”ning sotilmaydigan futbolchilar ro‘yxatida ekanligi aytilgandi, biroq futbolchi ketishni istasa, rahbariyat uni sotib yuborishdan boshqa iloji qolmaydi.
Ma’lumot uchun, ushbu mavsum “Real” hech qanday sovrin qo‘lga kiritmadi. Ular Ispaniya Kubogi, Superkubogi hamda La Ligada “Barselona”ga imkoniyatni boy bergan bo‘lsa, Chempionlar Ligasida “Arsenal”ga mag‘lub bo‘lib, turnirni tark etdi.
Shu sababli rahbariyat yozda jiddiy transferlarni amalga oshirib, yana sovrinlar qo‘lga kiritishni istamoqda.
Izoh (0)