Braziliya terma jamoasi va “PSJ” markaziy himoyachisi Markinyos faoliyatini Ispaniyada davom ettirishi mumkin. Todofichajes nashrining yozishicha, unga Madridning “Real” klubi jiddiy qiziqish bildirmoqda.
Xabarga ko‘ra, Antonio Ryudiger va David Alabaning jarohatga moyil bo‘lishi fonida, klubning yangi bosh murabbiyi Xabi Alonso tajribali, katta o‘yinlar bosimiga bardosh bera oladigan himoyachi izlamoqda. Yaqinda transfer qilingan Din Xeysen hali tajribasiz ekani hisobga olinsa, Markinyos “Real” uchun ideal nomzod sifatida ko‘rilmoqda.
Madrid klubi himoyachini 40 million yevro atrofidagi summa evaziga sotib olishni rejalashtirmoqda. Garchi Markinyos o‘tgan yili “PSJ” bilan 2028-yilgacha shartnoma imzolagan bo‘lsa-da, parijliklar safidagi ichki o‘zgarishlar va futbolchining yangi chempionatda o‘zini sinab ko‘rish istagi transfer amalga oshish ehtimolini kuchaytirmoqda.
Ma’lumotlarga ko‘ra, “Real Madrid” yozgi transferlar oynasida himoya chizig‘ini isloh qilish uchun 100 million yevrodan ortiq mablag‘ ajratgan.
Markinyos 2013-yildan beri “PSJ” safida to‘p surmoqda. Transfermarkt portali uning transfer narxini 35 million yevro atrofida baholamoqda.
U o‘tgan mavsum Fransiya chempionatida 22 ta o‘yinda maydonga tushib, 2 ta gol muallifi bo‘lgan.
Izoh (0)