Toshkent va Farg‘onada universitetlar kafedra o‘qituvchilari pora bilan ushlangandi. Oliy ta’lim, fan va innovatsiyalar vaziri Qo‘ng‘irotboy Sharipov munosabat bildirib, bu mutlaqo kechirilmas va keskin qoralovga loyiq harakat ekanligini aytdi.
Toshkent davlat iqtisodiyot universitetining kafedra o‘qituvchisi fuqaroni o‘qishga kiritib qo‘yish evaziga 4 000 dollar, Farg‘ona davlat universiteti kafedra o‘qituvchisi esa 3 800 dollar olgan vaqtida qo‘lga tushgandi.
“Mazkur holatlar mutlaqo kechirilmas va keskin qoralovga loyiq harakatlar bo‘lib, bunday noqonuniy urinishlar butun oliy ta’lim tizimiga dog‘ tushiradi”, dedi vazir.
Uning ta’kidlashicha, Oliy ta’lim, fan va innovatsiyalar vazirligi korrupsiyaga qarshi murosasiz kurash tarafdori bo‘lib, ta’lim sohasida bunday jirkanch holatlarga mutlaqo toqat qilmaydi. Ayniqsa, bunday holatlar davlat rahbari tomonidan ustuvor yo‘nalish sifatida belgilangan halollik va adolat tamoyillariga zid bo‘lib, jamiyatda ishonchsizlikni yuzaga keltirish xavfini tug‘diradi.
“Hurmatli o‘qituvchilar va soha vakillari. Biz sizlardan bilim va tarbiya berish orqali jamiyatga xizmat qilishni kutamiz, jinoyat sodir etishni emas. Har bir pedagog bu muqaddas kasb ortida yurt kelajagi, inson taqdiri turganini chuqur his qilishi kerak”, deyiladi vazir munosabatida.
U oliy ta’lim tizimidagi har bir rahbar va xodim korrupsiyaga qarshi shaxsiy mas’uliyat bilan yondashishi, bu borada faqat qonun doirasida faoliyat yuritishi shartligini aytdi. Abituriyentlarga esa hech kimning pora evaziga oliygohga kiritishga haqqi yo‘qligini qat’iy bildirdi.
“Siz faqat o‘z bilimingiz orqali adolatli tanlov asosida talaba bo‘lishingiz mumkin”, dedi Qo‘ng‘irotboy Sharipov.
Uning qayd etishicha, huquqbuzarlikka qo‘l urgan shaxslar qonun oldida javob beradi va ularga muqarrar jazo qo‘llanadi.
O‘zbekistonda 2025/26-o‘quv yili uchun oliy va professional ta’lim muassasalariga o‘qishga kirish test sinovlari 14-iyuldan boshlanib 23-iyulgacha davom etadi. Oliy ta’lim muassasalarining bakalavriat ta’lim yo‘nalishlariga hamda professional ta’lim muassasalariga abituriyentlarni onlayn ro‘yxatga olish 25-iyun kuni yakunlangandi. 2025/26-o‘quv yili uchun davlat oliy ta’lim muassasalarining bakalavriatiga o‘qishga kirish uchun onlayn ro‘yxatdan o‘tgan abituriyentlar soni 732 411 nafarni tashkil etdi. Bu so‘nggi 7 yildagi eng kam ko‘rsatkich.
Izoh (0)