Chempionlik masalasi deyarli hal bo‘lgan A Seriya va La Liga, Germaniyada yangi yetakchi, Angliyada ustoz-shogird kurashi. Top-5 ligalar jadvalidagi holat haqida
Mart oyidagi FIFA kunlari sabab klub futboli, xususan, Yevropa top-5 ligalarida ham musobaqalar tanaffusga chiqdi. Mavsumning so‘nggi choragi oldidan top-5 ligalar musobaqa jadvaliga ahvol qanday? Ushbu sahifada shu haqida so‘z boradi.
APL. Chempionlik uchun kurashayotgan ustoz-shogird va YCHL yo‘llanmasi uchun “qonli jang”
Premyer Ligada “Arsenal” bitta o‘yin kam o‘tkazgan ta’qibchi “Manchester Siti”dan 8 ochko oldinda. Musobaqa tugashiga 10 tur qolganini inobatga olsa, mazkur farq yaxshigina ustunlikdek ko‘rinishi mumkin. Biroq Mikel Arteta jamoasini “Liverpul”, “Chelsi” va to‘g‘ridan to‘g‘ri raqobatchi “Manchester Siti”ga qarshi o‘yinlar kutib turibdi.
Dastlabki ikki o‘rin deyarli aniq bo‘lib ulgurgan bo‘lsa, Chempionlar Ligasiga yo‘llanma beradigan keyingi ikki pog‘ona uchun yaxshigina kurash kechmoqda. “Manchester Yunayted” ochko yo‘qotishda davom etmasa nafaqat top-4 likdagi joyini mustahkamlashi, balki chempionlik uchun ham harakat qilishi mumkin. “Tottenhem” va “Nyukasl”ning beqaror natijalari so‘nggi vaqtlarda ancha o‘ziga kelib qolgan “Liverpul”ning top-4 lik uchun asosiy da’vogarlar qatoriga qaytishiga sabab bo‘ldi.
Angliya oliy divizionida jon saqlab qolish uchun kurashayotgan jamoalar raqobati ham bu mavsum o‘zgacha. Yaqqol autsayder yo‘q, 12-o‘rindagi jamoa so‘nggi pog‘onadagi klubdan bor-yo‘g‘i 4 ochko oldinda.
La Liga. Intrigani “ko‘mgan” klasiko, o‘z o‘yinini topib olgan “Atletiko”
Tanaffus oldidan o‘tkazilgan turning so‘nggi o‘yinida “Barselona” ta’qibchisi “Real”ni mag‘lub etib, oradagi farqni 12 ochkoga yetkazdi. Xavi jamoasi joriy mavsum bor-yo‘g‘i 9 ta gol o‘tkazib yuborganini inobatga olsak, keyingi 12 tur davomida 13-14 ochko yo‘qotishiga ishonish qiyin.
Oxirgi oltita turni olganda “Atletiko” eng yaxshi natija qayd etmoqda. Bu oraliqda “El Cholo” shogirdlari faqat Madrid derbisida durang o‘ynadi va qolgan barcha uchrashuvlarni g‘alaba bilan yakunladi.
A Seriya. “Napoli” gegemoniyasi va kutilmagan ta’qibchi
Mavsum avvalida musobaqaning so‘nggi turlariga kelib “Napoli” yaqqol peshqadamlik qiladi, uning eng yaqin ta’qibchisi esa “Latsio” bo‘ladi deyilsa hech kim ishonmasdi. Luchano Spaletti qo‘l ostidagi jamoaning mavsum davomidagi barqaror o‘yini, Milan jamoalarning sustlashgani va “Yuventus” atrofidagi voqealar A Seriya joriy mavsumini so‘nggi yillardagi eng noodatiy musobaqaga aylantirmoqda.
Mavsum tugashiga 11 tur qolganda “Napoli” 19 ochkolik farq bilan chempionlik masalasini deyarli hal qildi. Intriga faqat keyingi uch o‘rin uchun kurashda qoldi. Milan shahri jamoalari, “Roma” va “Atalanta”ning so‘nggi turlardagi ketma-ket ochko yo‘qotishidan unumli foydalangan “Latsio” ikkinchi o‘ringa ko‘tarilib oldi. 15 ochkodan mahrum qilinib, quyi o‘rinlarga tushib ketgan “Yuventus” ham top-4 likka yaqinlashib qoldi.
Eldor Shomurodovning “Spetsiya”si esa ligada qolish uchun kurashmoqda.
Bundesliga. Yetakchilikni qo‘ldan chiqargan “Bavariya”, yilni ko‘tarinki o‘tkazayotgan “Borussiya D”
FIFA kunlari oldidan o‘tkazilgan turda “Bavariya” Xabi Alonso boshchiligidagi “Bayer”ga yutqazib qo‘ydi va dortmundliklarni o‘tkazib yubordi.
“Borussiya” qishki tanaffusdan keyin ligada biror marta yutqazmadi — 9 g‘alaba va Rur derbisidagi 1 durang. Mazkur seriya evaziga “arilar” peshqadamga aylanib oldi. JCH—2022 dan oldin Dormund jamoasi yetakchi “Bavariya”dan 9 ochko ortda qolgan holda, 6-pog‘onada borayotgandi.
Liga 1. “PSJ” va boshqalar
Fransiya chempionatida odatiy tusga aylangan vaziyat: Parij jamoasi yaqqol peshqadam, qolgan o‘rinlar uchun ayovsiz kurash.
“PSJ” ta’qibchi “Marsel”ni 7 ochkoga ortda qoldirmoqda. Biroq Kristof Galte shogirdlari tanaffusga yomon kayfiyatga yo‘l oldi. 28-turda jamoa “Renn”ga mag‘lub bo‘ldi.
