Madridning “Real” klubi hujumchisi Kilian Mbappe Klublar o‘rtasidagi Jahon chempionatining 1/8 final bosqichida “Yuventus”ga qarshi bo‘lib o‘tadigan o‘yinda maydonga tushadi. Bu haqda jamoa bosh murabbiyi Xabi Alonso ma’lum qildi.
-6qzR-rLJ.avif)
Ispaniyalik mutaxassis o‘yindan oldingi matbuot anjumanida futbolchining sog‘ligi borasida quyidagicha fikr bildirdi:
— Mbappe o‘zini ancha yaxshi his qilmoqda. U o‘yinga tayyor, — deya Xabi Alonsoning so‘zlarini Madrid Xtra nashri keltiradi.
Avvalroq, 19-iyun kuni fransiyalik futbolchi o‘tkir gastroenterit (ichak infeksiyasi) tashxisi bilan kasalxonaga yotqizilgani xabar qilingandi. Ma’lumotlarga ko‘ra, u davolanish jarayonida 4–5 kilogramm vazn yo‘qotgan. Mbappening ahvoli 18-iyun kuni “Al-Hilol”ga qarshi o‘tkazilgan (1:1) bahs arafasida yomonlashgan. Shu sababli u bir necha kun davomida faqat mevalar bilan oziqlanib, suv ichish bilan kifoyalangan. 25-iyun kuni esa futbolchi ilk bor jamoaning umumiy mashg‘ulotlariga qo‘shildi.
Eslatib o‘tamiz, “Real” — “Yuventus” uchrashuvi bugun 1-iyul oqshomida, O‘zbekiston vaqti bilan soat 00:00 da boshlanadi.
Izoh (0)