Bryussel G‘azoda inson huquqlari buzilgani haqidagi ayblovlar ortidan Isroil bilan assotsiatsiya bitimini to‘xtatishga tayyor. Bu haqda Politico nashri xabar bermoqda.
Nashr ma’lumotlariga ko‘ra, Yevropa Ittifoqi bir qator chora-tadbirlarni, jumladan, Yevropa Ittifoqi-Isroil assotsiatsiyasi to‘g‘risidagi bitimni to‘liq to‘xtatishni o‘rganmoqda. Ushbu bitim tomonlar o‘rtasidagi savdo va siyosiy hamkorlikni tartibga soladi.
Yevropa tashqi siyosat xizmati tomonidan tayyorlangan hujjat bir nechta variantni taklif etadi. Eng qat’iy variant — bitimni to‘liq muzlatish. Yana bir variant — Binyamin Netanyaxu hukumati bilan siyosiy muloqotni to‘xtatish. Biroq buning uchun Yevropa Ittifoqiga a’zo barcha 27 davlatning bir ovozdan qo‘llab-quvvatlashi talab etiladi. Vengriyaning Isroilga xayrixoh pozitsiyasini hisobga olsak, bu deyarli imkonsiz.
“Bitimning savdo qismini to‘xtatib turish yanada real qadam hisoblanadi. Bu Isroilni Yevropa Ittifoqi bozoriga imtiyozli kirishdan mahrum qiladi va to‘liq konsensus talab qilmasdan malakali ko‘pchilik tomonidan qabul qilinishi mumkin. Hatto bunday qadam ham Yevropa Ittifoqi eng yirik savdo sherigi bo‘lib qolayotgan Isroil iqtisodiyotiga jiddiy zarba beradi”, deyiladi maqolada.
Shuningdek, Yevropa Ittifoqi bosib olingan G‘arbiy qirg‘oqdagi noqonuniy Isroil aholi punktlaridan tovarlar importini taqiqlashi mumkin. Umumyevropa chorasi yakdillikni talab qilsa-da, hujjatda ko‘rsatilishicha, a’zo davlatlar milliy darajada bunday cheklovlarni joriy etishga haqli.
Boshqa takliflar orasida Isroilni Horizon va Erasmus kabi Yevropa Ittifoqining ilmiy va ta’lim dasturlaridan chiqarib tashlash, shuningdek, texnik hamkorlik va o‘zaro anglashuv memorandumlarini to‘xtatish ham bor.
Muhokamaga sabab bo‘lgan Yevropa tashqi siyosat xizmatining hisobotida Isroil inson huquqlariga rioya qilish bo‘yicha o‘z majburiyatlarini buzgani ta’kidlangan. Xususan, Isroil G‘azoning aholi zich joylashgan hududlarida qurol ishlatib, keng ko‘lamli harbiy kampaniya boshlagani va gumanitar yordam yetkazilishiga jiddiy cheklovlar joriy qilgani qayd etilgan.
Yevropa Ittifoqi Tashqi ishlar vazirlari takliflarni kelasi hafta bo‘lib o‘tadigan sammitda muhokama qiladilar. Shu orada Yevropa Ittifoqi tashqi siyosat idorasi rahbari Kaya Kallas Bryussel Tel-Aviv bilan G‘azoga gumanitar yordam yetkazib berish bo‘yicha kelishuvga erishganini ma’lum qildi. Biroq amalda vaziyat hali ham o‘lik nuqtadan siljimagan.
Izoh (0)