Quyosh energiyasi iyun oyida birinchi marta Yevropa Ittifoqida asosiy energiya manbaiga aylandi. U shu tariqa atom va shamol energetikasini ortda qoldirdi. Bu haqda Reuters xabar berdi.
Iyun oyida uning umumiy ishlab chiqarishdagi ulushi 22,1 foizni tashkil etgan. Bu 2024-yilgi ko‘rsatkichdan (18,9 foiz) yuqoridir. Atom elektr stansiyalari va shamol generatorlari Yevropa Ittifoqi mamlakatlarida mos ravishda 21,8 va 15,8 foiz elektr energiyasini ishlab chiqargan.
Yevropa Ittifoqining kamida 13 davlati, jumladan Germaniya, Ispaniya va Niderlandiya, quyosh panellari orqali elektr energiyasi ishlab chiqarish bo‘yicha eng yuqori oylik ko‘rsatkichga erishdi.
Bloomberg ma’lumotlariga ko‘ra, 10-iyul kuni Fransiyada quyosh energiyasini ishlab chiqarish rekord darajaga yetdi. Bu esa tarmoqlarda arzon elektr energiyasining ko‘pligi tufayli narxlarning noldan pastga tushishiga olib keldi.
Parij vaqti bilan soat 14:00 da mamlakatdagi quyosh elektr stansiyalari rekord darajadagi 19,5 gigavatt ishlab chiqargan. Bu esa milliy elektr energiyasiga bo‘lgan talabning qariyb 40 foizini qoplagan.
Elektr energiyasi ham neft va gaz kabi ulgurji bozorlarda sotiladi, biroq muhim bir farqi bor: agar yoqilg‘i zaxiralarda saqlanishi mumkin bo‘lsa, elektr energiyasini katta hajmda jamg‘arish texnologiyasi hali mavjud emas. Elektr toki bir vaqtning o‘zida ishlab chiqariladi va iste’mol qilinadi, shuning uchun agar ishlab chiqarish talabdan ancha oshib ketsa va ortiqcha energiyani saqlab bo‘lmasa, narxlar manfiy qiymatga tushib ketishi mumkin.
Izoh (0)