O‘zbekiston milliy terma jamoasi hujumchisi Eldor Shomurodov Italiya A Seriyasining “Roma” klubidan Turkiya Superligasidagi “Bashakshehir” jamoasiga o‘tdi. Istanbul klubi matbuot xizmati xabariga ko‘ra, futbolchi 2025/26-yilgi mavsum oxirigacha ijaraga olindi. Shartnomada 2,7 million yevro evaziga majburiy sotib olish bandi ham mavjud.
Shomurodov — “Bashakshehir”dagi eng qimmat futbolchilardan biri
Transfermarkt portali ma’lumotlariga ko‘ra, Eldor Shomurodovning hozirgi transfer qiymati 5 million yevroga teng. Bu ko‘rsatkich bilan u “Bashakshehir” tarkibidagi eng qimmat futbolchilardan biriga aylandi. Ganalik himoyachi Jerom Opoku ham shuncha qiymatga ega. Shuningdek, Feysi Ebosele va Berat O‘zdemir kabi futbolchilarning narxi ham 4 million yevrodan yuqori baholangan.
“Bashakshehir” jamoasining umumiy transfer qiymati 55,2 million yevroga teng bo‘lib, bu ko‘rsatkich bilan klub Turkiya Superligasidagi eng qimmat beshta jamoa qatoriga kiradi. Undan oldingi o‘rinlarni esa quyidagi klublar egallagan:
- “Galatasaroy” – 248,8 mln yevro
- “Fenerbahche” – 237,6 mln yevro
- “Beshiktosh” – 146,2 mln yevro
- “Trabzonspor” – 91,3 mln yevro
Turkiya Superligasidagi eng qimmat futbolchilar
Eldor Shomurodov ayni damda liga doirasidagi eng qimmat 55-futbolchi hisoblanadi. Eng qimmat futbolchi esa — “Fenerbahche”ga “An-Nassr”dan kelgan kolumbiyalik Jon Dyuran bo‘lib, uning qiymati 35 million yevroga baholangan. Ikkinchi o‘rinda “Galatasaroy” futbolchisi Leroy Sane (32 mln yevro), uchinchi o‘rinda esa “Fenerbahche” hujumchisi Yusuf En-Nesiri (24 mln yevro) joylashgan.
“Bashakshehir” — qisqacha tarix va Yevropadagi ishtirok
“Bashakshehir” ilk bor 2006/07-yilgi mavsumda Turkiya Superligasida to‘p surish huquqini qo‘lga kiritgan. 2012/13-yil mavsumda birinchi ligaga tushib ketgan klub, oradan bir yil o‘tib yana oliy divizionga qaytdi va o‘shandan beri Superligada doimiy ishtirok etib kelmoqda.
Jamoa 2017/18-yilgi mavsumda ilk bor Yevropa Ligasining guruh bosqichida qatnashdi. 2019/20-yilgi mavsumda esa tarixidagi ilk chempionlikni qo‘lga kiritib, keyingi mavsumda Yevropa Chempionlar Ligasi guruh bosqichida ishtirok etdi. O‘sha paytda Turkiya chempionatida “Galatasaroy”, “Fenerbahche” va “Beshiktosh” navbatma-navbat chempionlikni qo‘lga kiritib kelayotgan edi. “Bashakshehir”ning bosh sovrinni qo‘lga kiritishi haqiqiy sensatsiya bo‘ldi, chunki o‘sha yillarda Turkiya jamoalari orasida mavsum oxirida ko‘pincha “Galatasaroy” yoki “Fenerbahche” chempion bo‘lishi kutilardi. “Bashakshehir” esa ushbu stereotiplarni sindirib, oltin medallarga ega chiqdi.
Ular so‘nggi bor 2022/23-yilgi mavsum Yevropa miqyosidagi musobaqada qatnashgan. O‘shanda “Bashakshehir” Konferensiyalar Ligasining guruh bosqichida munosib ishtirok etgan va pley-off yo‘llanmasini qo‘lga kiritgan. Biroq ular 1/32 final bosqichiga Shvetsariyaning “Bazel” klubiga ikki o‘yin natijasiga ko‘ra 1:2 hisobida mag‘lub bo‘lib, turnirdagi ishtirokini yakunlagan.
2024/25-yilgi mavsumni Superligada 5-o‘rin bilan yakunlagan “Bashakshehir” 2025/26-yilgi mavsum Konferensiyalar Ligasi 2-saralash bosqichida ishtirok etadi. Klub saralashdagi ilk o‘yinlarini 24 va 31-iyul kunlari Bolgariyaning “Cherno More” jamoasiga qarshi o‘tkazadi.
Jamoa va stadion haqida
“Bashakshehir” o‘z uy uchrashuvlarini Istanbuldagi “Fotih Terim” stadionida o‘tkazadi. 2024-yilda foydalanishga topshirilgan ushbu arena 17 ming tomoshabinga mo‘ljallangan.
Jamoa tarkibida Shomurodovdan tashqari yana 13 nafar legioner to‘p suradi. Ular orasida eng taniqlisi — braziliyalik sobiq “Milan” futbolchisi Leo Duarte. Shuningdek, Jerom Opoku, Useyn Ba va Frensis Nzaba kabi xorijlik futbolchilar ham “Bashakshehir” safida harakat qilmoqda.
Izoh (0)