Брюссел Ғазода инсон ҳуқуқлари бузилгани ҳақидаги айбловлар ортидан Исроил билан ассоциация битимини тўхтатишга тайёр. Бу ҳақда Politico нашри хабар бермоқда.
Нашр маълумотларига кўра, Европа Иттифоқи бир қатор чора-тадбирларни, жумладан, Европа Иттифоқи-Исроил ассоциацияси тўғрисидаги битимни тўлиқ тўхтатишни ўрганмоқда. Ушбу битим томонлар ўртасидаги савдо ва сиёсий ҳамкорликни тартибга солади.
Европа ташқи сиёсат хизмати томонидан тайёрланган ҳужжат бир нечта вариантни таклиф этади. Энг қатъий вариант — битимни тўлиқ музлатиш. Яна бир вариант — Биньямин Нетаньяху ҳукумати билан сиёсий мулоқотни тўхтатиш. Бироқ бунинг учун Европа Иттифоқига аъзо барча 27 давлатнинг бир овоздан қўллаб-қувватлаши талаб этилади. Венгриянинг Исроилга хайрихоҳ позициясини ҳисобга олсак, бу деярли имконсиз.
“Битимнинг савдо қисмини тўхтатиб туриш янада реал қадам ҳисобланади. Бу Исроилни Европа Иттифоқи бозорига имтиёзли киришдан маҳрум қилади ва тўлиқ консенсус талаб қилмасдан малакали кўпчилик томонидан қабул қилиниши мумкин. Ҳатто бундай қадам ҳам Европа Иттифоқи энг йирик савдо шериги бўлиб қолаётган Исроил иқтисодиётига жиддий зарба беради”, дейилади мақолада.
Шунингдек, Европа Иттифоқи босиб олинган Ғарбий қирғоқдаги ноқонуний Исроил аҳоли пунктларидан товарлар импортини тақиқлаши мумкин. Умумевропа чораси якдилликни талаб қилса-да, ҳужжатда кўрсатилишича, аъзо давлатлар миллий даражада бундай чекловларни жорий этишга ҳақли.
Бошқа таклифлар орасида Исроилни Horizon ва Erasmus каби Европа Иттифоқининг илмий ва таълим дастурларидан чиқариб ташлаш, шунингдек, техник ҳамкорлик ва ўзаро англашув меморандумларини тўхтатиш ҳам бор.
Муҳокамага сабаб бўлган Европа ташқи сиёсат хизматининг ҳисоботида Исроил инсон ҳуқуқларига риоя қилиш бўйича ўз мажбуриятларини бузгани таъкидланган. Хусусан, Исроил Ғазонинг аҳоли зич жойлашган ҳудудларида қурол ишлатиб, кенг кўламли ҳарбий кампания бошлагани ва гуманитар ёрдам етказилишига жиддий чекловлар жорий қилгани қайд этилган.
Европа Иттифоқи Ташқи ишлар вазирлари таклифларни келаси ҳафта бўлиб ўтадиган саммитда муҳокама қиладилар. Шу орада Европа Иттифоқи ташқи сиёсат идораси раҳбари Кая Каллас Брюссел Тель-Авив билан Ғазога гуманитар ёрдам етказиб бериш бўйича келишувга эришганини маълум қилди. Бироқ амалда вазият ҳали ҳам ўлик нуқтадан силжимаган.
Изоҳ (0)