Ozarbayjonning Minval.az nashri 2024-yil 25-dekabr kuni Grozniy shahriga yaqinlashayotgan AZAL Embraer E190 samolyoti urib tushirilgani haqida shov-shuvli ma’lumotlarni e’lon qildi.
Ma’lum qilinishicha, tahririyatga anonim xat kelib tushgan. Xatda havo hujumidan mudofaa kapitani samolyotga Rossiya Mudofaa vazirligi buyrug‘i bilan o‘q uzilganini ta’kidlagan tushuntirish xati, shuningdek, video, audioyozuvlar va texnikaning nosoz holati haqida batafsil ma’lumotlar mavjud.
274-sonli jangovar mashinaning komandiri, hisob-kitob boshlig‘i, kapitan Dmitriy Paladichukka tegishli tushuntirish xatida nishonlarni aniqlash stansiyasi potensial nishonni aniqlagani, funksiyali radiolokatsion stansiya (MRLS) bilan aniq kuzatuvga olingani bildirilgan.
“Telefon orqali menga nishonni yo‘q qilish buyrug‘i berildi. Juda qalin tuman tufayli optik qurilmada nishon ko‘rinmadi, bu haqda VKPga xabar berildi. Soat 08:13:30 da operatorga nishonni yo‘q qilish buyrug‘ini berdim. Soat 08:13:33 da raketa yo‘naltiruvchidan uchirildi. Soat 08:13:47 da BM-72V6 markaziy harbiy tizimi nishon o‘tkazib yuborilgani haqida xabar berdi. Soat 08:13:48 da takroran o‘qqa tutish buyrug‘ini berdim”, deyiladi tushuntirish xatida.
“Biz kapitanning imzosi bilan tasdiqlangan ushbu xatning haqiqiyligini tasdiqlay olmaymiz. Biroq uning mavjudligi, shuningdek, ushbu hujjatning yarim yildan beri davom etayotgan tergov va jamiyat uchun ahamiyati uni e’lon qilishga majbur etmoqda. Bundan tashqari, olingan ma’lumotlar Ozarbayjon Respublikasining fojia tafsilotlarini tekshirayotgan vakolatli organlari uchun foydali bo‘lishi mumkin.
Ammo xat mazmunini tasdiqlovchi uchta ovozli xabarning audioyozuvini haqiqiy deb hisoblash mumkin. Biz muzokaralarning to‘liq matnini keltira olmaymiz - ularni hali tergov organlari o‘rganishi lozim. Biroq shuni ta’kidlash joizki, uchala ovoz ham operativ buyruq berilganini, ikki marta o‘q uzilganini va raketa parchalari uchib ketishi natijasida samolyotga tegib ketganini tasdiqlagan.
Shubhasiz, bu ma’lumotlar chuqur tahlilni talab qiladi va tegishli tuzilmalar bu imkoniyatni qo‘ldan boy bermaydilar”, deyiladi e’lon qilingan maqolada
O‘zi nima bo‘lgandi?
2024-yil 25-dekabr kuni Oqtov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasining Embraer samolyoti ishtirokida fojiali aviahalokat yuz berdi. Boku—Grozniy reysini amalga oshirayotgan samolyot favqulodda qo‘nishga urinish chog‘ida halokatga uchradi. Bortda 62 nafar yo‘lovchi va 5 nafar ekipaj a’zosi bo‘lgan.
38 kishi halok bo‘lgan, yana 29 kishi jarohatlangan. Prezident Ilhom Aliyevning ta’kidlashicha, layner radioelektron kurash vositalari yordamida boshqarilmaydigan holatga keltirilgan va keyin Rossiya hududidan hujumga uchragan. Uchuvchilar Rossiyaning eng yaqin aeroportlaridan biriga favqulodda qo‘nishni so‘ragan, biroq ularga hamma joyda rad javobi berilgan, shundan so‘ng samolyot Kaspiy dengizini kesib o‘tib, Oqtov shahriga qulagan.
Aliyev halokat uchun javobgarlikni Rossiyaga yuklab aybdorlarni jazolashni talab qilgan. U, shuningdek, Moskvaning samolyotning havo hujumidan mudofaa tizimidan o‘qqa tutilishi faktini qushlar bilan to‘qnashuv va bortdagi gaz balloni portlashi haqidagi “bema’ni taxminlar yordamida yashirish”ga urinishlaridan g‘azablangan.
Halokatni tergov qilishda ICAO (Xalqaro fuqaro aviatsiyasi tashkiloti) konvensiyasiga muvofiq Qozog‘iston boshchilik qilmoqda. Ishda Ozarbayjon, Rossiya mutaxassislari, xalqaro ekspertlar va Embraer vakillari ishtirok etmoqda. Qora qutilar olib qo‘yilib, xalqaro ekspertlar ishtirokida rasshifrovka qilinmoqda.
Izoh (0)