Rossiya va Belarus “ishonchli, obyektiv axborot taqdim etadigan” va “suveren” sun’iy intellekt tizimini birgalikda ishlab chiqmoqchi. Bu haqda Rossiya-Belarus Ittifoqi kotibi Sergey Glazev ma’lum qildi.
“Yoshlar xorijiy, ayniqsa, AQSH va Xitoyda ishlab chiqilgan sun’iy intellekt modellaridan tobora ko‘proq ta’sirlanmoqda. Ular manipulyatsiyaga zaif”, dedi Glazev.
Uning so‘zlariga ko‘ra, G‘arbda sinovdan o‘tkazilgan mashhur chatbotlardan biri irqchilik va ekstremistik fikrlarni, jumladan, fashizmni ulug‘lash holatlarini namoyon etgan.
Glazev sun’iy intellekt platformalari tadbirkorlik va innovatsiyalarni qo‘llab-quvvatlashi, ammo, shu bilan birga, “asosiy an’anaviy qadriyatlarni” saqlashi kerakligini ta’kidladi.
“Qadriyatlarsiz tadbirkorlik — bu vayronkor va ma’nosiz harakat”, dedi u.
Mazkur tashabbus Rossiya va Belarusning G‘arb texnologiyalaridan mustaqil bo‘lish, raqamli suverenitetni mustahkamlash yo‘lidagi sa’y-harakatlari fonida ilgari surilmoqda. Xususan, Ukrainadagi urush va G‘arb sanksiyalaridan so‘ng Rossiya mahalliy sunʼiy intellekt tizimlariga ustuvorlik bera boshladi.
Shu bilan birga, xalqaro tadqiqotchilarda Rossiya sunʼiy intellekt tizimlarining shaffofligi va betarafligiga oid shubhalar bor. Belgiyadagi Gent universiteti tadqiqotiga ko‘ra, Rossiyaning eng yirik til modellari YandexGPT va GigaChat siyosiy senzura darajasi bo‘yicha dunyodagi eng yuqori ko‘rsatkichlarni qayd etgan. Ular muhim siyosiy savollarga javob berishdan qochgan yoki mavzuni muhokama qilmaslikni tavsiya qilgan.
Izoh (0)