Germaniya kansleri Fridrix Mers Rossiya urush sababli Ukrainaga yetkazilgan zararni qoplashi shartligini aytdi. Bu haqda u Rimda Ukrainani tiklash bo‘yicha konferensiya doirasida ma’lum qildi.
Berlinning hisob-kitoblariga ko‘ra, yetkazilgan zarar miqdori taxminan 500 milliard yevroni tashkil etadi.
Rossiya bu moddiy zararni qoplashi kerak. Bu amalga oshmaguncha, u muzlatilgan Rossiya aktivlariga kira olmaydi va kirishi mumkin emas, deya ta’kidladi Mers.
Rossiyaning yuzlab milliard yevroga teng davlat aktivlari, asosan Yevropa Ittifoqi mamlakatlarida muzlatilgan. Kanslerning aytishicha, bu aktivlardan tushayotgan daromadlar hozirda ham Ukraina kreditlarini ta’minlash uchun yo‘naltirilmoqda.
Mers, shuningdek, Ukrainani tiklash xususiy sektor va xalqaro hamkorliksiz mumkin emasligini ta’kidladi. Uning fikricha, bu nafaqat Ukraina, balki Germaniyaning o‘zi uchun ham manfaatli:
Bu umumiy siyosiy tartibimiz, Yevropadagi erkinlik, bozorlar erkinligi, iqtisodiy o‘sish va energetika xavfsizligimiz uchun zarurdir, dedi u.
2024-yilda G7 mamlakatlari Rossiyaning muzlatilgan aktivlaridan tushgan daromadlarni Ukrainani qo‘llab-quvvatlashga yo‘naltirishga kelishib oldi. Bu mablag‘lar Kiyevga berilgan 50 milliard dollarlik kreditni so‘ndirishga ham sarflanadi.
Ukrainani tiklashga qancha mablag‘ ketadi?
Ukraina bosh vaziri Denis Shmigal uch yildan ortiq davom etgan urushdan keyin tiklash xarajatlarini 14 yil davomida 850 milliard yevroga baholadi.
Bizning konsepsiyamiz umumiy hajmi bir trillion AQSH dollari bo‘lgan ikkita jamg‘arma tashkil etishni nazarda tutadi, degan Shmigal.
Birinchi jamg‘arma Kiyev nazoratida bo‘lgan “Ukraina jamg‘armasi” bo‘ladi. U xorijda musodara qilingan 460 milliard yevrodan ortiq Rossiya aktivlari, shuningdek, Rossiya xomashyosi eksportiga qo‘yiladigan maxsus soliq hisobidan moliyalashtirilishi rejalashtirilgan.
Qariyb 400 milliard yevrolik ikkinchi jamg‘arma xususiy investitsiyalar hisobidan shakllantiriladi. Shmigal, shuningdek, ittifoqchilarni 2026 va 2027-yillarda Ukraina byudjeti taqchilligini qoplash uchun qo‘shimcha moliyaviy mablag‘ ajratishga chaqirgan.
Izoh (0)